朗聲四起

kayiasaa amani ku tatulrepenga si musahahe ku tamugakua ki daigake ki lalakeli, kay masiasilange mahamahamau ka aidavacenga kidaili ikay gakulini, mauvagavagai papiya ki talicubungulini, pasingiakidremedremaku sibulrubulru liniya si ngulryalringau ku tangilribataneli sa asituwaku.

ngwalringavaku sa akusiavaku, twalainai lregelrege kela drataa, satau mudanaku gaku maelre ki makakaela ku tatulrangica ka paihange kibulru, ahakai ku tusinalremea ceele nakuwa, myakiamaniaku kwadra singimaela ka kawmasa kela ka umase mukuludru mugaku, lapadrima ku kulrunganeli kauhiva ku ciniyukukana, ku sapasyasilangeli pualrivale nakuwa. latwalainganaku kalrase mugaku, lusikinginai yakaiyaku ki tauthu kisahalihalidri. pakela sa tabelengenganaku mwa ki sangningisi, kiapadradresengaku ku musaesakenengali kadruwa ka akahimuhaneli ka singsi, sa kibulruwaku iniya, ngyatulukaku anika yakai ku pahamiyaikai ki thahiha ka singsi miya.

masulrapele makilibake, luceelenaiya ka lasituini pahamahamau, inilringanaku, pahecenge nakuwa ku sausi ki takibulrubulruwanenai.

lu amyalrealre amaniyaku ka mwaelebe, lu angiyaiyaubu laamaniyaku ka waelebe swausi. la amaniyaku ku walripethele selredre ki cukuini, puliu ku acilaiini. lu mutauwananenga ku hedelaneli, pasuhu patangeangea nakuwa si bulru ku takakulrunganeli, sitaku kahedele mutauwana.

lauai iyanumi ikai, manema ku takathahiha lutwatumana ikay langucacapanga ka aunga? ai ikay nakuwa, kiaseasenaku ku tasudralruwa nakuwa, ku tapasudalepa ku tatwatumananeli, ngwalai ku tasudralruaneini, kimanemanenga ka aunga, kadruwa ku salradhaneli, mwakuludraku lu kasamadre nakuwa. miyalri ngwalai ku sakyadiadilini bulru nakuwa, lusikingaku twaladhaku ki tauthu wasidi haupapucucubungu kela kabiceaka, alathingalenganaku kay wasikingi niya kadruwa ka matiaukuludru.

padalru ku zikange, kadruwa ka patakulringau sika aisicegiyunganaku, idra tausahahaneli ka vai, paukalrivilaku pwacase pikai ki kapingi ku sakiaseaseneli, maelanenga ku sakyalibakeini, ku tabulruwa nakuwa, ku tapasapukuwana nakuwa!

今日參加女兒的畢業典禮，除了祝福孩子們，自己也陷入學生時期的回憶。國小搬下山，與漢人一起學習，因膚色迥異、國語不輪轉、學習跟不上，成為鄙視的焦點而害怕上學。直到三年級，遇到此生最難忘的老師。

老師對學生一視同仁，親切和藹，相信我並賦予我很多的工作，放學後，留我個別指導。她對我的信任和肯定，養成我對事情負責的態度。她耐心的指導，也讓我的成績明顯的進步。畢業當天，寫了張卡片，謝謝這位我最敬愛的老師！