朗聲四起

Adihayay ko kapasinan a demak no ’Amis iti:ya ho. Sowal sa ko malitengay, ano mamalingad ko i loma’ay anca maminokay to ko palafangay i, cowa kanga’ay ira ko ma’esingay o tatiihay a pinangan konini. Latek o tatahalifak anca tahakefa to tatiihay i lalan, aro’ sa ho aka ka pacieci a malingad sa ko tawcikel no malitengay.

Ano sataliyoliyok sa a mitata’elif koya mi’edaway a ’ayam i ka’ayaw no miso a ma’efel i, pasayra i semosemotan a micomod awa to mahadak, o pipaini nira a pakafana’ to maliyangay a laloma’an no mita, o tatatiih ko rakat nangra, alatek tahakefo’ to pades, cowa ko mamalemed ko lingad.

Ano mami’adop to, mamifoting to i, ma’araw ho koya mafana’ay a mi’edaway a ’ayam tomireng i ka’ayaw no miso i, o mamalemed ko rakat no miso anini a nimaamaan sa.

Roma sato, cowa ka nga’ay a milinah to nisacapoxan no tao patayra i niyah a omah. O tadacipaysinay ko hatiniay a demak. Ano ira ko cipadesay a laloma’an no niyaro’ i, cowa ka nga’ay pacieci sa a matayal, hawad han ho ko tatayalen no omah, tayra toya cipadesay a loma’ to cecay a romi’ad padiheko paholol to cipadesay a laloma’an.

Ano maliyang to hatiniay a pinangan i, mafadi’ maemin ko nisacapoxan no miso.

O ekong i kaikor no loma’ ano lalekal sa a mia’ekong i, todong to pakafana’ay to iraay to ko mahawawaay a fafahiyan. O citiyaday a fafahiyan i, cowa ka nga’ay a tomireng i ta’enengan no loma’, ya saan ma’at’at ko hofoc.

Roma sato, i’ayaw no pisaloma’ i, tayra ho toya pipatirengan to loma’ a sera a milafin, itiya ano pakalemed a mati’ih ko nanom i, o mamanaop no cedas koya pipatirengan to loma’ a sera, ano mati’ih ko namal i, o mamairoh ko nipatirengtan a loma’.

Ano pakaniti’ih to minokayay to a tamdaw i, caremcem sato ko faloco’ a misaromi’ami’ad toya matiihay a demak, ano saan i, fetilen to epah, pa’icepen, patafaken, teli han i tadimocokan no hangalo. Sowal han, “ O roma to ko miso a kaitiraan, aka ka katayni micana’is takowana, painien kako to sakalemed to romi’ami’ad, o nanay to nisafaloco’an no mako konini ”.

族人相信，當有人打噴嚏時，應該暫緩一切活動；若占卜鳥飛過並消失不能外出。打獵或捕魚，若占卜鳥停在面前，則預示豐收。移動別人種的秧苗是禁忌，若有人去世，需停止田間工作陪伴喪家。家後有貓頭鷹叫聲，則表示家中會有孕婦，孕婦也不能站在門檻上，以免影響分娩。建房前，屋主須先露宿建地，若夢見水或火，未來可能會遭遇水災或火災。夢見已故親人且感到不安，族人會進行簡單儀式，表達對已故親人的敬意並祈求平安。