朗聲四起

O kacanglahan a palapatan, malengaw ko nipalomaan ni fofo a dateng, rohroh sa a malangdaw ko padatengan ni fofo, kahirahira sa ko ’adipangpang a maefer i padatengan, kahemekan, maolah kako tona padatengan ni fofo. Tahidangan ni fofo kako ato safa a mikosam misadafdaf to padatengan. Tahira ho i padatengan ko safa i, hemek sanay a milalepel to ’adipangpang. Anaana ko dateng ako sa ci fofo a milekal.

Ma’araw ho ko kasaofaofang no tamana, todong to o nga’ayay to a datengen. Hapinang han ako a misahacecacecay ko papah no tamana a minengneng, iraay itira hakiya ko fao? O sasongila’en a mitayal konini a  demak, hay mafana’ay milalimek ko fao i papah no dateng. pakahapinangay ho ko mata namo to pikari’ang no fao, sa ci fofo. Ma’araw ho ako kora fao i, tangsolen to a miala, tahira i kalahecian no piala to fao i, maedeng cecay to a so’ot a maemin! Ona pidimokos niyam to narorayan ni fofo a padatengan i, idahiyay to kamo sa ci fofo a mahemek.

Doedo sato i, mitoro’ ci fofo tora i dadasian a milaladay a tomato, sowal sa, alaen kora marohemay to a tomato sa. Ma’araw ako ko ta’angayay marohemay a tomato i, maharateng ako koya miciyanan a tomato ato fita’ol, tanohemek sa kako a mipitpit. Itiya pacekok sa ko safa a milekal, sa’aredet sa a kaenen tona tomato sa. O caroh to nira sakakomaenaw korira, kakekkek sato kako aci fofo a mitatawa.

Miaala to fao, mipitpit to tomato, micefos to dateng i padatengan ni fofo, tadakahemek to! Ahowiday ci fofoan a malalok a misadateng sapakaen tamiyanan. Sowal sa ci ina, o sanga’ayay a kakaenen, o sakatanektek no tireng ko nipalomaan ni fofo a dateng sa.

每到春天，菜園充滿生機，我和弟弟會一起幫忙照顧菜園。弟弟總是忙著抓蝴蝶，而我則小心翼翼地檢查高麗菜葉子，確保沒有菜蟲。當阿嬤指示摘下熟透的蕃茄時，想到自己最愛的蕃茄炒蛋，弟弟也忍不住先嚐一顆蕃茄，讓大家忍俊不禁。阿嬤澆水時，陽光照射下，弟弟興奮地發現彩虹，並開心地玩水，成了落湯雞。感謝阿嬤辛勤種菜，並認為阿嬤的菜是最健康、最好吃的，這段回憶充滿溫馨和快樂。