朗聲四起

Laqi ta seejiq tnpusu embbiyax sayang o wada wada paru bi mrana ni knpriyux ka kndusan dha da. Ini bi pndka saw kndusan ta embbiyax seuxal kida. Kndusan embbiyax seuxal han o saw hari kndusan rudan knxalan siida, mniq dgiyaq daya ka sapah dha, ungat samaw, tdruy, sbrigan, ptasan… Pusu bi dngusun dha o qulung dhuq mkla cicih qmpah dxgal niqan uqun ni mkla mkbbuyu ni tminun do kika embrax nanak meudus hida. Kiya ka kiya ni aji ka embiyax bi ni mqrinut ni mqraqil hari ka kana kndusan dha siida.

Knxalan embbiyax sayang do uxay wana mkla kndusan rudan seuxal, nii kska knxalan klwaan Klmukan ka sayang da. Ana manu qpahun ni uuda kana klwaan ta o mseupu ta mddayaw muda kana ni emppgaluk ta kana uri. Mseupu kana kngkla ni biyax ta qmpah pkrana qmbliqan klwaan ni kana seejiq txtaxa ta hiyi. Uxay wana haya, mggaluk kana mtqiri klwaan knlangan babaw dxgal uri ni mdka ta saw kingal ruwan sapah. Paah kana txtaxa kngkla ni biyax ni lnglungan ta mseupu smmalu pkrana qnbliqan kndusan ta babaw dxgal. Saw mha mrana bi ka uuda ni ana ima seejiq babaw dxgal o msblaiq ta bi mseupu meudus kana.

Tgkingal, knbibayx ta tmisa ni dmudul tmquli dhyaan. Nii o qpahun ta ita rudan kiya. Paah rbnaw ni bitaq paru ka laqi o wana rudan ka pusu bi dmanga mdakil, mqita qmlahang kana lnglungan na ni tmgisa ana manu uuda na, kika mnduwa bi mttuku mdakil ni embrax ka hiyi ni mrana ka ana manu knkla dha uri. Msblaiq bi ni ini qnaqih ka kndusan dha siida.

Tgdha, knbiyax ta bi powsa ppatas kngklgan ptasan ka laqi ta. Paah patasn laqi bilaq bitaq paru ptasan mtghdu bi muda matas kana o kika mha mrana mttuku bi ka knkla ni kkla dha. Yasa pusu bi biyax ka knkla. Knkla o asi ka mnda pnaah mnatas. Ini uda matas ni gmquring miying ana manu do ungat iyah na kida. Hici bi do o asi ka niqan mslagu qsahur ni gnealu lnglungan ka seejiq sun. Nii o pusu bi ka saw nii ni maa balay bi ka uuda ni mslagu bi lnglungan o kika msblaiq bi kana kndusan ta seejiq babaw dxgal ni ungat mqnaqih ni mqraqil mdka ta saw gaga mniq tlangan baraw. Nasi mnduwa murug saw nkari mu nii o ana bi rabnag meudus kida.

現代的青少年已漸漸增強與轉變，與我們過去的青少年時代，傳統生活迥異。早期只要能做些農作物、野外採集、漁獵等能活著即可。但現代工商科技化生活，必須人人相互分工合作各盡本分，為達到謀求人類幸福及和平生活，以達成適應現代化生活。父母家庭好好教養好兒女，培育孩子自幼稚園至大學接受完全的學校教育，知識即力量，來謀求生活技能。

培育真理、正義心與愛心，使身心靈健全，共同謀求幸福和平人生，共存共榮。