朗聲四起

idaw i luma’ aku kya cacay a tutuy u lumeni’ay ku kulit a wacu u makaymaway atu caay pitengil, u lumeni’ay a banuh cinida, na i dadan misaliwliw, nu milakalakay i dadan kya wacu niladayan nu wama aku pataluma’ cinida. nu duman a demiad mahamin satu namalabi, misaculiculil i capi ku wama makaadih tu lumeni’ay a tutuy nu wacu mikilul tu inudikudan cinidan, sisa pataluma’ hantu cinida nu wama, mananuh amin kami, kyu pangangan han ci “Sima”.

hinabi’ay yu adidi’ henay ci “Sima”, manamuh mikilim i cukecukutan mabi’, sademiadmiad sa mabi’ cinida, anu hicahicaen muawaw mahida u caayay pakatengil ci “Sima”. anu pacici han mipalal cinida, mikilim aca tu dumanay a kakitidaan mabi’ aca, tada u micidekay atu kabiyalawan a tutuy manengil satu ci “Sima”. anu manengil ci “Sima” saayaway a kawaw u mamukan tu kakanen, kasikasican haymaw satu tayda i kaysingan, haymaw satu muninac mukan tu si-liyaw, alahican tada yadah tu ku nikanan, ya bili’ tabaki satu masakimulumulu saan cinida.

sakapahay ku tadamasimaw nu luma’ay ku nidiputan sa. nani haymawan midiput sa, katukuh i tuluay a bulad ci “Sima” malatanektekaay tu misalebulebud misahidahida tu hina biyalaw hina takatakah u saicelangaay tu ku balucu’ a wacu. anu miasik tu ci ina aku, mikilul tu saasikan milalabah misaliwliw, kanca pasayda aca cinida i saasikan milibabuy. anu mabi’ tu kami tu nadikudan u sakanamuhan nida mibalakas misalama tu bakiya, mamin ku bakiya nu luma’ay lingiden patayda i sasa nu takal atu elun midimut, tasa nipikilim tu nidimutan kami tu bakiya, u sakalingesan u sakatawaan.

ya udip atu bili nida manamuh salamaen a matiyung nu niyam cinida, misaasu’ tu nisalamaan sademsem tu udip sa, sisa manamuh mulingaling tu tangah patahkal tu kasumanahay a sema, haymaw sa mininac tu lima’ a misalama i tisuwan , pasayda ku misabelabelat ku lumeni’ay a mata i tisuwan a papelek.

cacay tu ku mihcaan ni “Sima” ayda, kapah ku nisimawan nu luma’ niyam, lumeni’ satu ku banuh salungan sa adihen. anu mamin malabi misaculiculil, i liwliw nu luma’ atu i putah ku ama aku, idaw ku sasacabayan nu wama. u sacabayan nu wama cinida, malasacabayan tu nu luma’ay mamin.

我家有隻小黑狗，是爸爸帶回來的流浪狗，叫做「Sima」。Sima小時候愛睡覺，怎麼叫都像沒聽到。若把牠吵醒，牠會再找地方繼續睡。Sima醒來就是吃，有時吃得太多，肚子就會變得圓滾滾的。Sima是好奇心強頑皮的小狗，喜歡趁我們睡著後，把拖鞋叼走，讓我們到處找。牠喜歡我們摸牠的肚子和身體，Sima一歲了，毛色十分好看。爸爸晚餐後散步，也有了好夥伴。牠是爸爸的好朋友，也是全家人的好朋友。