朗聲四起

kabaliyusan ayda demiad a hicaen musakawaw la’cus hen aca a tahkal, i katibahawan nu tatukian sa, a mihica tu sa ci baki sakamu sa i tamiyan, “matineng haw kamu kya i labian muculal ku deku sa palita i tamiyan?” lingaling sa ku tangah niyam maliyuh a patukil tu nipalitaan ni baki, tuwa sakamu hantu ni baki kami tu nikaydaan lalekalan nu kungku.

inaayaw i kasumamadan sa, idaw kya cacayay a deku patiyam a misiwbay tu sapakulit sapicengel a tuudtuudan, i tawya a demiad sa, culal sa kya tataytayay a ayam taynien i nipipatiyaman, makaadih tu mapacayitay a sasing nu tuluk bangcal sa melawan nida, kyu milunguc tuya tawki nu deku apakulit kaku saca cengelen ku udip aku haw sa, siduma hamin han ku canacanan a kulitan a pakulit sa, maydih ci nida a mala u sabeliyangay sabangcalay a ayam ku nasaan.

uyda hantu ya makasicay misiwbayay a tawki nu deku, simsim sa kayadah ninasapakulit kalibutan sa mulaliwngiw ku balucu’, hani pipalawpes saan tu tuki aku matalaw a masipun, kyu sipacamul hantu amin kya zayliw nu cacengelan misakaku a pakulit tiya ayaman. siduma han nida a misalama caykatenes mamin satu, u tangah atu udip niya labang mamin tu mala u lumeni’ay ku banuh. ya mapakulitay a nicengelan a ayam makadih tu nikahida sa, mapatay a malinges macudah a micaculi, kuatudi tu siwacah ku cihek maynah tiya tawkian nu deku, “akak! akak sa! mamipatay haw sa!”

tumahida sa, ya mamin a mala u lumeni’ay ku banuh nu udip a ayam sa, kakayda satu sipangangan han nu tademaw u “akak han”, tahmahini sa ya macengelay ku banuh a ayam sa malinges henay, sanisani sa ku nikatatuwa maynah “akak! sa”, kahinian nu kawaw sa ya makasicay a deku, tucila a demiad sa edepen nida ku panan nu nipatiyam, matalaw a sikalitemuh i dadan niya akak, sisa i nudikudan u labi satu ku sakatahkal nu deku caay kaadih i demidemiad musaungay.

颱風天，無聊之餘，爺爺問：「你們知道為什麼貓頭鷹總在夜間出現呢？」以前有隻貓頭鷹開了家顏料店。有天，有隻鳥來到店裡頭，要貓頭鷹老闆為他染色，他要成為一隻最美麗的鳥。懶惰的貓頭鷹老闆將各種染料混在一起，染色之後，客戶的羽毛都變成黑色。被染黑的鳥氣急敗壞，向貓頭鷹老闆抗議：「啊！啊！氣死了！」被染成全黑的鳥就稱為「烏鴉」，因為懶惰而壞事的貓頭鷹把店關了，怕在路上遇見烏鴉，所以白天都看不見貓頭鷹的蹤跡。