朗聲四起

Na muskun ata miliskin i ituBununtuza ka elqumisan tu maku-aq a nanu ka, tangus ang ata muskun miliskin i issia taki-Iudia bunun tu elqumisan, ma-aq sia taki-Iudia tu bunun a elqumisan a patasan amin haan tekiqabas sisipulun tu petasan ta, maszang amin nenka tu asa tu sanasia sinpatumantuk ta kuzakuza, ma-aq a anqelu ka anpukun a sikopa tu bunun tu siza-a amin i batu labatu tepataz istaa tu, ma-aq ata amin a Bununtuza siduq tu asa kapimopa sintataqu tu samu ta kuzakuza ka, na tudiip masihal miqumis haan dalaq nastu ti. Ma-aq is heza ka ikmuli ki samu ta ka, ni-i amin piqumisun, mopa na ki’haz i tastulumaq nait tastusiduq. Paaq pu-un, asa tu kapimopa matusuqtis i is-atusasamu ti.

Ma-aq a taki-Iudia bunun a sia Ihuva Tamadaza pakahaan nasMusis ta pataqu nai ta tu mopamopa sia taki-Iudia tu bunun a sinpakapimaupa, uu ka, kapimopa-un i taki-Iudia tu bunun. Ma-aq nai ta ka elqumisan a, sia tekiqabas a sisipulun tu petasan ta ma-aq mita Bunun-tuza ka elqumisan a mopa ta amin tu sia melanqabasan tu elqumisan ta, maszang amin tu issia Tamadaza sinpekahaan melantangus sintaqu tu is-atusasamu ta, tis-uni ata ka Bununtuza siduq tu kapimopa ki is-atusasamu ta ka, paaq pu-un min-uni ata Bununtuza tumananu-un tu masisihal tu miniqumis.

Ma-aq al-uka ka is-atusasamu kun a nepas almaku-aq ata lopa ko, nepas ni-i tu na lusqa palinqaqeu mapapataz i bunun mapakadikla, uka tu tikis a elisvala-an. Maku-aq in lopa ko ka Bununtuza ki? Mopa tupa in tu uka in a samu ka, katmang in palasasamu, nait palinqeu, ma-asqaz i bunun, minpakadikla in, tuza tu kelakinang is miliskin, paaq pu-un asa ata tu sisuqesun a is-atusasamu kun makusia, na maqtu ka Bununtuza musuqis minmaszang qabas ang a elqumisan.

Ni-i ka elqumisan un lusqa na mapindikla bunun, sasoqbung ata ki elqumisan tun i, ma-aq a elqumisan un a na ispinsihal i tastusiduq tu bunun ta, ma-aq is kapimopa ta ata ka na maqtu is-insihal i tastusiduq ta tu bunun, na maqtu ka tastusiduq tu bunun mapakadedaz, mapakasihal, mapa-indangazdangaz, mapanahiavhiav, simaq a uka-an i nakonun a mapasaivsaiv ata, mopa ta ata qabas, ni-i tu makishung, maqtu ata mapinvai. Minmantuka ata! Musuqesa maszang qabas tu mapakasalpu ka tastusiduq tu bunun, uu ka na tudiip ata ka Bununtuza medadaza, na uka bunun a samatemang mita, na samasqing amin a duma siduq tu bunun un.

 

布農族文化可從以舊約聖經說起。

我們布農族的舊約聖經，就是傳統文化，也就是所謂Is-atusasa-mu。布農族Samu的意義：忌諱、法律、誡命、禁戒、禁止、典禮、禮貌、迷信、規定、秩序、文化、制度、習俗、典章、律例、祭儀等。