朗聲四起

’bagan kawas qani, mnwah sami mcisal sa qalang Macu’ ka qutux ngasal myan. te qutux ryax gbyan, musa sami gmluw hopa qasu’ sa Kirong. iyat sami mnwah na’ qalang Macu’ ru iyat sami gnluw hopa qasu’ na’ uzi. lmawa mnaga sami kya sazing tmucing ru cyux mlawa qu bes maku muci “ t’aring ta mbkuw musa mtazil hopa qasu’ la ” . mbkuw sami musa mtazil sa hupa qasu’. trang sami masuq mbkuw mtazil zik hopa qasu’ lga, rema lhngan balay la.

lama sami musa hmkangi ’byan na qutux qutux hi myan nanak, ’lwan sami ’byan myan nanak lga, musa sami mtzil syaw na hopa qasu’ magal saying la!

kya hazi mopuw tmucing kinhngyan qasu’ lga, tehuk sami qalang Macu’ la. ulung su lmon sami cyumong qu ’byan kki’an myan bih syaw bsilung ka hupa srabu ru pzyux balay ’byan nya qu ngasal qasa. msqun sami maki kya kwara qutux ngasal myan. phapuy sami nanak uzi.

mqas ru blaq balay qsliq ni yaya maku, mtnaq balay nyux ta maki ngasal nanak ma. qlyan lga, mkilux balay kayal nya Macu’,  memaw ini ksoya lmosay ana inu qu yaya maku, si ryax mhngaw zik ngasal mita teribi.

te pucing ryax sasan, masuq sami klama lga, musa sami tblaq tama mnaga glgan hopa qasu’ sbzih ngasal Taywan la.

mnwah sami ga, ini spzyang hupa sbas qsya’ ru ini tkgil tunux sami, yasa qu ini sami koxi muci “ pgluw ta qasu’ lozi”. ryax qasa ga, kya maki sbehuy nya te Taywan ma, iyat sami tryax gmluw hupa qasu’ ru ini myan baqi smpung m_yan kayal qani ga muci nanu maki ska bsilung hya. nanak inlungan lmnglung mha ” kya mtnak sa innwahan ta ”.

t’aring miray hupa qasu’ ru n_gyut’ musa ska bsilung lga, wiy! yaqih cikay wah, mha saku nanak. si ktay, glgi saku musa tthmqan son nya sswe maku kneril qu yaya maku, maki saku te ska psalan mnaga lha. ru “ talagay kinbsyaq ini uwah ” muci saku, “ cyux hmswa kya la ” lmnglung saku, ’say ta mita cikay muci saku! ’lwan maku lhga lga, ktan maku yaya “ cyux si hoq hoq mutaq. Swa ini mtnaq mnwah ta pi?

我們家族旅遊首次前往馬祖，從基隆搭郵輪出發。等了兩小時才上船，啟航已是深夜，航行十小時後抵達。我們住在海邊民宿，能煮飯，感覺像在家一樣。馬祖天氣炎熱，媽媽不願外出，我們則租摩托車遊覽。晚上享受烤肉與海鮮。最後一天早餐後，我們直接前往碼頭搭船回程。來時海上平穩，沒暈船，回程卻遇上風浪，媽媽竟然暈船嘔吐，與來時完全不同，讓我們驚訝不已！