朗聲四起

O kalakaying no ’Amis hananay, tada makapahay ko faluco’, o malalokay a mawmah a midemak to kalotayal. O mafana’ay aca mi’adipit micekiw i riyar, mikalang midamay i ’alo. Caayay katalaw to cidal ato ’orad, nikalan lomuwad to a miradum mitumes to ciwkeng, misakimokimol ho a mi’asik to taliyok no loma’. Maherek i, tangsul mifaca’ to riko’ no laloma’an i ’alo, tahaloma’ maherek a mipawali to riko’ i talacawka a misakaranam.

Malaheci to ko kalotayal no palomaen i, tayra i omaomahan a midateng to masamaamaanay a dateng, kakaenen i romi’ami’ad. Mafana’ay aca a romadiw ato masakero, mapapaliw aca a matayal to romi’ami’ad, mapapadapadang, madadamadama to widang, o kaolahan no nimanima a tamdaw.

Malaud to ko mihecaan no kaying ato kapah i, misakilikilim to hawidang no niyah, ano matama ko kalalecad no faluco’ i, ma’ainiini to harateng to sakanga’ayaw a malacafay. Ano masasiolah to i, misitapang to koya kaying a tayra i loma’ noya fa’inayan a mipadang misulimet, mi’asik to taliyok no loma’, miradum ho i tefun to nanom sapitumes toya ciwkeng, misakimokimol ho a misakalafi.

Iti, yaho, hatiniay ko nika kalatamdaw, malalok i demak ko ’orip no kaying, cuwa kaliyang to suwal no wama ato fakifaki, mi, tengilay to paini no wina ato faifai. Mafana’ay aca a midiput to safasafa ato salikaka, awaay ko sasuwalen to pinangan no kaying. ’Araw han ko anini a kaying, caayay to pakado^do toya makapahay mahaenay a demak. So’linay, ona fangcalay, ’inanengay no litengan ho a kalatamdaw i o lalahecien no mita. Anini sato, masiroma to ko pinangan no kaying ato kapah, cuwa to kangodo to malitengay. Pakayni to i demak han i ko^esitay to a ma’ocor, pasitira sanay to i tawikidan ko mata anca misalafiifii cuwa to kapakaliyas, o ngoyos ko karekiay o toka ato honito ko tala’ayawa. Cecay ko suwal samo^ete^etep sato ko paculi, o pising ato riko’ ko saka^eles, fokil saca a misulimet to dafudafung no kafoti’an, awaay to ko kahemekan to pinangan nangra.

阿美族公主，漂亮又勤奮於工作，擅長採集河、海生物，無畏日曬雨淋，晨起挑水、清理住家環境、洗衣及準備早餐。

農閒時，常去野地採集各種野菜，能歌善舞、樂意助人，廣結善緣、人見人愛。

年輕男女若邁入適婚年齡，積極尋找傾訴對象，若情投意合，公主便主動協助男友整理家務、挑水及準備晚餐。

早期，公主重視做人處事之道，現代之年青子女們已無此種品格，傳統美德是值得我們後人效仿。