朗聲四起

kalakaying no ’Amis hananay, tada makapahay ko faloco’, o malalokay a maomah a midemak to kalotayal. O mafana’ay aca mi’adipit micekiw i riyal, mikalang midamay i ’alo. Caayay katalaw to cidal ato ’orad, nikalan lomowad to a miradom mitomes to ciwkeng, misakimokimol ho a miasik to taliyok no loma’. Maherek i, tangsol mifaca’ to riko’ no laloma’an i ’alo, tahaloma’ maherek a mipawali to riko’ i talacawka a misakaranam.

Malaheci to ko kalotayal no loma’ i, tayra i omaomahan a midateng to masamaamaanay a dateng, kakaenen i romi’ami’ad. Mafana’ay aca a romadiw ato masakero, mapapaliw aca a matayal to romi’ami’ad, mapapatadotado, madadamadama to widang, o kaolahan no nimanima a tamdaw.

Malaod to ko mihecaan no kaying ato kapah i, misakilikilim to hawidang no niyah, ano matama ko kalalecad no faloco’ i, maainiini to harateng to sakanga’ayaw a malacafay. Ano masasiolah to i, misatapang to koya kaying a tayra i loma’ noya fa’inayan a mipatado misolimet, miasik to taliyok no loma’, miradom ho i tefon to nanom sapitomes toya ciwkeng, misakimokimol ho a misakalafi.

Ano maolah ka kapah toyanan a kaying i, tayra i loma’ noya kaying a pakasoy, masarorororong ko kasoy to patayraan, paseneng to ’icel ato faloco’ no niyah to sakaca kapadeng ko namal no parod nora loma’, pacafay a maomah, midongec, mi’adop, mifoting to hasapakaen to wama ato wina nora kaying.

Iti:yaho, hatiniay ko nika kalatamdaw, malalok i demak ko ’orip no kaying, cowa kaliyang to sowal no wama ato fakifaki, mi:tengilay to paini no wina ato faifai. Mafana’ay aca a midipot to safasafa ato salikaka, awaay ko sasowalen to pinangan no kaying. ’Araw han ko anini a kaying, caayay to pakado^do toya makapahay mahaenay a demak. So’elinay, ona fangcalay, ’inanengay no litengan ho a kalatamdaw i, o lalahecien no mita. Anini sato, masiroma to ko pinangan no kaying ato kapah, cowa to kangodo to malitengay. Pakayni to i demak han i koesitay to a maocor, pasitira sanay to i tawikidan ko mata anca misalafiifii cowa to kapakaliyas, o ngoyos ko kalikiay, o toka ato honito ko tala’ayaaw. Cecay ko sowal samo^te^etep sato ko pacoli, o pising ato riko’ ko saka’eres, fokil saca a misolimet to dafodafong no kafoti’an, awaay to ko kahemekan to pinangan namira.

阿美族公主漂亮又勤於工作，擅長採集河、海生物，無畏日曬雨淋，晨起挑水、清理住家環境、洗衣及準備早餐。農閒時，常去野地採集各種野菜，能歌善舞、樂意助人，廣結善緣、人見人愛。年輕男女若邁入適婚年齡，若情投意合，便主動協助家務、挑水及準備晚餐。男方看中公主，便綑綁乾柴送至公主家，使其爐灶生旺，義務助理農忙，採藤心、狩獵、漁獵來孝敬公主之父母親。

早期，重視做人處事之道，此傳統美德是值得我們後人效仿。