朗聲四起

rgyax qaniy ga giwan qyunam qabax qalang, ini nbah mkrusa cquliq miyup qutux rgyax, mluw yan qaniy gaga klahang rgyax, qqes na qutux qutux qyunam uyi ga, wayan rema blequn pkgun qmasux binheci ta cyunga, qyunam, roq pyangun, qabax qqes qyunam, nyan qa mrhuw pklahang qalang mwah cmpung ru mlahang.

qutux qutux glux ga, nyan mlahang qutux qutux gaga na qqalup, uka sinnwalan ga, ini cbalay hmut miyup qyunam na cquliq, smi mrusa qyunam ga, siki mkkayan ru mqbaq, maha kya ga thuyay hmtuy sinqilan ru pincriqan. mtnaq nasa uyi, mlata cqa qyunam ga, lmon mqbaq ini ga cyan nha rema syan rusa qyunam qaca la. Gaga na qqnxan rgyax qaniy ga, giwan klahang pinsqunan qabax qyunam, msqutux inlungan hmtuy qinlupan ki hinriqan na cquliq, teta mblaq qabax qqnxan llaqi tayal. qutux qutux klahang gaga na qyunam qalanag ga, nyan nanak mrhuw cmpung qqes, hminas qqes hbiyax qsinux huyil ga, spatun nha qabax qsinux, mquriq magal cnriq na cquliq qsinux lga phugun la.

musa miyup qutux na qyunam ga, siki mqbaq ini ga cyan nha rema syan mrusa rgyax qaca, mhmut miyup lga, isu ki huyil magal qilis la, giwan nyan mwah cmlaq qyunam na cinqyunam, qaniy ga, qutux nanak na psaniq, maki hupa sinn’ang na utux bnheci. qabax gaga qaniy ga snibil ki pinsbaqan binheci ta cyunga, qaniy uyi ga, giwan iyat tqlihul gaga qnxan klahang na qyunam, thuyay mwah mhut inlungan qabax llaqi na tayal puqing pqalup.

maki nanak sinrhuw gaga psaniq tayal, ciriq qsinux maki qyunam na cquliq ga, siki sbiq su qsahuy he na qnasux nqa cinqyunam, (yan nqa hquy na mit rgyax, waqit biyok nhyun, tnguqiy) ini su biqi ga, phugun su utux ta bnheci. mnaki qalang tayal, mha cqaniy hmiriq gaga hlgan hqilan ru wayal ki mpyut puniq qbuli. nanu mica, ini calay hmut s’ari ru hmiriq, qsinux cniriq uyi ga, ana galun he nya hiya, nanak calay hquy na mit rgyax, waqit biyok nhyun ru tnguqiy ga, siki sbiq su cinqyunam, baha hmcwa, qabax qqaya na qsinux qaniy, san nha mbes m’yux biyok qinyatan, squnun nha maniq qutux klahang gaga na sinl’tan.

gaga klahang rgyax qaniy ga mtnaq inlungan ru kntayux ta tayal cyunga, qabax qqnxan, inlungan, ptiywawun, he prkyasun, nyan blequn mlahang cqa utux ta bnheci ta.

山林為部落共有財產，依山川劃定領界，各部落有專屬獵場。嚴禁未經同意越界，否則視為犯禁忌。領袖隨時檢視邊界，設陷阱須通知族人，嚴格維護土地規範與前人權益。山林法則維護獵場權益，嚴禁越界盜獵，獵物越界則共有，私佔者將受懲治。在他人獵場捕獲獵物，肉可以隨意取走；但重要部分（如山羊角、豬獠牙、鹿茸等）必須帶給獵場主人，以避免觸犯祖靈禁忌，招致不幸後果。

山林法則受祖靈主宰庇佑，影響族人生活禁忌與靈性成長。