朗聲四起

ta sicuayan izuwa a tjaljiqacaqaca a nadjeljesem a vacalj i panavanavalj tja nuitjen a kacalisiyan, liyaw tu liyaw a sacemel a qemuzinuzip a vaivaik a semazuwa a temekel ta zaljum. azuwa tjamadju a i qinaljan a cinunan nu matjatjaucikecikel madjuludjulu a djemameq ta sacemel izuwa aya. izuwa tu ita qadaw izuwa tjamadju a matjelu a cinunan, navaik a paljilji ta dringay, masulem anga sa iniyanan a djaljun i yumaq, mapurepur a tacemekeljan vaik a remaselem a kipakim tu inu anga tiamadju. kiculjevan a djalan a pinakazuanan djemaljun i tuwa zuwa vacalj, djumaken a vuluq, a tjakit, a turivecavecan niamadju, ljakuwa kumalji a kemuda a karakim a sikataqaljan ika djemumak. kemasizuwa anga tjametjuruvuruvu a maulaulaw i puvacaljan a sikataqaljan niamadju.

izuwa tisa camak a namicaucauwan aravac a rarakacan, a kinapupiculan a kinasauqaljayan nu tja pacunan matutjapupicul ta cumay a kinamalangan. a pinivaruvarung nisa camak, pasa vaik sakamaya a kisuvarung a paljilji tuki anemangata sa sikaulaulaw nua sikataqaljan. kiranav tisa camak tu ita qadaw vaik a pasazuwa i puvacaljan ta tjaukaljiyaljiya, djemaljun timadju pacacikel a lemuiluv a penulingetj ta vacalj, neka sakamaya a nanemanemanga!

cuaiyanga kisululjayan a kiipuq tisa camak i patekuteku ta kasiw a i ljaviljaving ta vaca1j, ika cuway sevaik a maca nimadju sa sekataqed tisa camak. manu izuwa za kemac ta kula nimadju sa rakaci timadju a pasa vacalj. sepacegedan tisa camak, manu pacunan tuazuwa a varaljuvalj a kudral tu kudral a natemangpac ta kula nimadju. siljisuk ta tjakit sa uri seqasi a piqulu a varaljuvalj, maqaquljuc tisa camak katua varaljuvalj namaya ta minatunatuk a mavalidilidi a zaljum i vacalj, ika cuway maruljem ta djamuq a vacalj matu nasemeliyap a kavulungan a pasa qudjiljan.

izuwa a mapida a nakiqilja a sikataqaljan, a tjemavatjavan ta kiquljuquljuc tisa camak, ta pacun tiamadju tua namaruljem anga ta djamuq a vacalj, galugu tiamadju sa qarauqav tu macay anga tisa camak aya. manu pacunan tisa camak a ljemanguljanguwi a pasaljaviljaving, sa masilevan a galugu tiamadju tu “ pinapacay anga nisa camak a vararuvalj ” aya.

從前，有座大湖常有很多野獸到那兒飲水。因此，部落的人很容易就能捕獲獵物。有天，三個男人去湖邊打獵沒有回家，家人去湖邊尋找，只找到長矛、刀及工具。失蹤的人愈來愈多，有個勇士camak前往大湖查看，什麼東西都沒有看到，就躺在湖邊樹下睡覺，有東西咬住他的腳，想把他拖進湖中，是隻蛟龍。camak驚醒，立即抽出佩刀，往蛟龍的頭上砍去、纏鬥，湖水像沸水翻騰，被血染紅，然後看到camak游向岸邊，大家歡呼「camak殺死了巨龍」。