朗聲四起

Isia Huako isdaza tu Puluvangsu dalah, mananu hai matus tu madiav dalah at supahan mas batu, mais saduan hai uka tu tasa lukis, musasu tu madaing isaincia iviv. Aiza tu tacini munhuhuma tu bunun, isiacia ngan hai tupaun tu Puhuie, sai’ia hai isaincia makuuni batu kalumah, kaupa mas huspil sidi uskunan saicia.

Ukan mas lukis tu Puluvangsu dalah hai maiaupa atazan, Puhuie hai mililiskin tu naisia isdaza tu dalahcin masuaz mas lukis, at mabaliv sai’ia mas supah tu auksa. Makusanavan sai’ia sihailaz, maza naisuaz tu auksa hai isngulun saicia sia danum. Tankakutunin tu umum, madas sai’ia mas balu sinmas auksa, kudadaza sia masaunghuan makazkaz lak sauzan mas auksa, at sulan saicia mas danum, maszang masuaz mas aikas’angan. Maupacia sai’ia makakazkaz masusuaz, tutuza tu aizan mas ailmananuan, kaupakaupa hanian maupacia makaskas kuzakuza.

Tau tu painsananin, sinsuaz saicia sia dalah tasban mas’an tu mang tu auksa hai, kaz us’upa dusa tu mang mintalukai, haitu kaz tasa tu mang latasbang mas unghazavan tu tus’a, ni tu kaunun mas aluaz at mihumis.

Masihaltum sai’ia mas maisupah tu lukis, haitu masa aspulin hai kaunun mas sidi, at mauvaiv saipuk mas vanu.

Kaupa umum sai’ia masusuaz mas lukis, sadusadu lukis tu taldadaing, maza lukis hai saszangan saicia an’anak tu uvavaz, pisialun saipuk mapataldaing.

Kaupakaupa hanian sai’ia maku’uni ima mapin libus. Maza Puluvangsu makuang tu dalah hai niin saduan, min’uni pasitus tu lukis at minlibus. Maza libus hai maszang mas patdanuman, mahalivan tu dalah hai minuni supahan mas danum, utaulan mas danum, supahan ismut mas puah, maza autuk mas babu-vanis amin takilibus tu minihumis sinmas kusbabai tu hazam hai pan’anpuk saincia.

Maza tastu masaunghuan hai minvaiviin saduan, supahin bunun minsuma kahuma masuaz kakaunun, supah sinsusuaz puah mastanin hazam tu supah daingaz.

Tastu masaunghuan hai min’uni masial tu katdadan, sain hai itu Puhuie inihdian kuzakuza sinpala isaiv mas malankinuz tu bunun, mastan kadimanun tu sinpinaskal.

法國普羅旺斯高原原本荒蕪，只有黃土和岩石，沒有樹木，常吹大風。農夫Puhuie獨自蓋石屋，只有綿羊相伴。他立志在這片土地種樹，每天挑選種子浸水，清晨帶著種子和鐵棒種植。三年後，他播下十萬顆種子，約兩萬顆存活。因羊會吃樹苗，他改養蜂蜜，繼續照顧小樹如同孩子。日復一日，Puhuie用雙手創造森林，普羅旺斯高原不再荒涼，綠樹遍地，野生動物增多，生機盎然。這成為他留給後人的珍貴禮物。