朗聲四起

a sicuayan izua za lja Salakac, a namangetjez a qemiladj i Siniljizau aya, a salasaladj tia Paljaljai, tia Qaquangan, tia Qaveleng, tia Valuan, tia Taupili, tia Tequng, djemaljun tiyamadju izua i Siniljizau, qivu a mayatucu, “ tjara uri imazanan itjen ” aya tiamadju a masudju.

manu, izua vuqavuqalj a vatu, qau qemengal azua vatu, ini a djeljek izua i Siniljizau, “ masa qemengal a vatu? imaya tjamanguaq a itjinavalj,  imaya varung nua vatu qaumayan ” aya tiyamadju a kinemenem. manu mirava tiyamadju tua nanemanemanga tua turivecan a mapuljat, sa vaik auta, manu djemaljun itjanumaq, semekez azua vatu, “ aqu semekez auta a vatu? manu uri imazanga itjen aya varung na vatu?” aya.

ini a cuwai, vaik auta a vatu, semkez i draqadraqa auta, qau semekez auta tiyamadju, ai ljaqa masa uri imaza itjen aya.

manu tjau kalavut tua kai, vaik auta a vatu, djemaljun itua tapau tucu, kemali tua qipu a vatu sa qazaw, kemeljang anga tiamadju tua varung nua vatu, uri imazanga itjen naya varung nua vatu qaumayan. numayatazua, santapavi imaza numayan aya tiyamadju a maljavar.

qau, patagilj anga tiyamadju a semantapau, sa azua vatu inianga a midradrua iniyanga garavagav, qau ini a cuai anga azua vatu masan vuteqiteqilj a qaciljai tu talau anga.

aicu a milimilingan, nua ljaruvaniyau a inidjalanan a pupatagilj tua qiniladjan a qinaljan, patjetucu qivu a pasemalau a ljaruvaniyau a tjavuvu, ka sicuayan, napacun angata a niyamatjaljaljak tua aicu a namasan vuteqiteqilj a qaciljai tu talaw anga icasau tua katjumaqan aya. ljaua, masidjipun tuazua, patjavat anga itjen a pasalauz a qinaljan, tjavinaikan anga tjakatjumaqan, tjaranamavalit, namakapalak, namacekerap, namasabu anga, iniangatjen a pa kakarim tuazua a qaciljai.

kemasicuai angata, nuri kemakarim itjen tua tjalja manguaqan a kadjunangan, vutu a tja palaingan angata, nu patjezua a kadjeljekan sa semekez sa qemengal, avan nu si laingan nua tja ramaljemaljeng turi tjakaizuanan aya tjaucikel.

izua angata a pinapukakudanan nua kakudan a pitua vatu a sicuayan, qaumayan nuri kemakarim tua sekezan nua sikataqaljan, nu muri vaik a sema gadugadu a semacemecemel, kemacu angata tua vatu, sinan tarang sinan saladj nua ramaljemaljeng a sicuayan.

這是邏伐尼耀遷移至內文社時創建部落的故事，是由一隻靈犬引領著7個家族來到南方尋覓佳美之處，這隻靈犬引領他們數個地方後，到了舊內文社做為定居之地，但最後這隻靈犬變成一個白色六角石柱，立在Siniljizau(希尼尼繞)家門外守護他們。

根據田調的確在舊內文社家屋外有看過這傳說中白色六角石，但事過境遷，白色六角石因被破壞、被風化，如今不見了。過去族人要尋找居住地或打獵都需要靈犬引領，因為靈犬是最好的陪伴和保護。