朗聲四起

Kesu qhuni raus nii, egu bale gaga mdakil ssiyo alang seediq. Egu klegan ka kesun raus nii, ini hari pntena ka hei na qhuni ma waso na, duma de tumun ka hei na qhuni, duma de ciwin bbaro hari na qtaun. Qhuni raus nii, ngalan daha qhuni malu qmita ka seediq ta ita.

Yaani hari idas 2 ka ali ciida. Ini so ksekuy riyung di, kndudun malu hari ka karac nii, qmuyux kesun daha “ quyux sdaun ”. Quyux nii de qmita kesun mkphepah ka qhuni raus. Ciida duri de, prading tmukuy macu ka kana seediq. Anu mita hari karac kana ka rudan seediq cubeyo, qtaun daha mesa mphuwa ta saya peni.

Qhuni raus nii, hmeru ka hei qhuni na de. Kuxun riyung mekan ccamac lmiqu. Tuting dheran ka hei na de, meyah kana ka so rapic, brihuc, pada, boyak, qoric… ida nkiya, meyah mekan hei qhuni na. Ani kana waso ludux na duri kuhun daha riyung mekan.

Mdakil ka qhuni raus nii de, ado so mosa posa tlenga lmiqu ka riso seediq de, ngalan daha smalu bhenaq tlenga ka cida na qhuni. Anu qhuni saadux kesun daha ka raus nii. ani kana boyak ini bale kmekun tmulus, anu qhuni mbeyax ka raus nii mesa.

Misan duri de, kuxun daha ptahu malah ka qhuni raus nii, ado qhuni saadux, kiya ka bsiyaq pthuun ka qhuni raus nii. Mosa lumiqu ka seediq duri de, ngalan daha pcumux puniq duri, anu bsiysq sqama ma ini hari kpahun ka puniq na. kiya ka ngalan kesun qhuni malu ka raus nii ka rudan ta cubeyo.

Bobo na hndure hari nii de, ngalan daha phuma ngiro, anu ado qhuni saadux, kiya ka bsiyaq phmaan ngiro mesa, ini so nahari hari sburo ka qhuni na. Malu bale ngalan pila ka ngiro nii cbeyo, kiya ka egu bale ka dnayo na kkkingan sapah ciida, egu phuma ngiro ka seediq ciida mesa.

Saya de wada ini hari pntena ka qpahun ka seediq di, anaq sokiya duri, qhuni saadux ka heya, uka hari ka ngalan daha smmalu ani mmaanu ka raus nii saya, ani si qhuni raus nii de, maha daha pusaun lnlungan daha, anu egu bale gnkela daha pneyah qhuni raus nii ka rudan ta cubeyo.

賽德克族的部落有許多的青剛櫟，種類很多，是一種好樹種。每年的2月，這時的雨叫「qyuxu sdaun」，因為青剛櫟此時是花開時節，以它為名就叫「qyuxu sdaun」。當青剛櫟結果時，部落的年輕人去放陷阱，會取青剛櫟的枝幹為陷阱的bhenaq，因為韌度夠。冬天用青剛櫟當材燒。舉行火占儀式也會使用。青剛櫟可用主樑，也可以種香菇，段木香菇價錢很好，有不少人種植。

現在的生活改變，關於青剛櫟的傳統知識，仍會被傳唱。