朗聲四起

U kungku kiyari ku saremiremi’ad sananay a pacabay i titaan a matu’as, u nipapisimsim tu sakalatamdaw atu ngudu’ hananay a demak. Matiya u bangcal atu kapah nu balucu’ nu Pay-siyi-kung-cu, u bana’ atu tanektek ni A-li-pa-pa maekek kita tina kungkuan. I Ta-lu ira ku madademecay a mabekac nu rarukuh atu kuliyul.

Mabana’ kita misairairay kira kuliyul a mabuti’ i lanu nu kilang, a mademec nira rarukuh. Ira rarukuh hantu i, sakilemel saan a miherek tina babekacen tangasa i salikulay a mademec kira kuliyul. Herek satu caay pakabilu tu cidek atu ringes nu balucu’, ta a mangalay yaca a milunguc a madademec aca a mabekac, ira rarukuh hantu i, salipahak saan a paca’ub. Itiya i sariwsiw sananay a dabak, malecapu amin kira aadupan i kilakilangan, a mikihatiya tina salipahak sananay a demak. Pataynien tu kira tula’ a mala miterungay nu heni, a malingatu a madademec, kira tanu liel sananay a ’uma ku mamalara’ic a malingatu, u ngangusu’an nira tataakay a ecu ku mami’iyup, tu ya sapitela’ a suni, nu ma’inayan a rekuku’ ku sakalingatu nu heni a mabekac. Herek sa a marekuku’ kira ma’inayan, u besuc tu nira kuliyul a mabekac, akaa tu kabuti’ hantu, sulinay caacaay tu pisana’una’un.

U besuctu a mabekac a tangasa i kakatangasaan, i matini satu paengaw tu wamin tira rarukuhan, kiya awaay henay a mamelaw satu. I matini satu ira kiya kuwaw maka kakarayan a patangasa a pasuwal tu demak nira rarukuh, melaw han matengil tu nira rarukuh ku nipakungku nu heni. Mahaenay kiyari ku wayway nu rarukuh, caay pisawad, caay pisairairay, u besuc a miherek tu demak. Sisa makademec tira kuliyulan, ira kuliyul satu, i balucu’ tu nira kira nipisa’uya’uyaan. Sisa caay tu pisaawaay tira rarukuhan a misakilemel, ta mademec nira kira rarukuh. Mahaen kiyari ku kungku nina rarukuh atu kuliyul, u pasubana’ay i titaan, u sitatudungay amin kita tu bana’ atu kilemel, anu hay sa ku balucu’, sakilemel han a miherek, akaa katalikul ku nisimsim, besuc han a miherek tangasa i salikulay, ira kapahay a demak, u nima henay caay kaw nu tireng tu.