朗聲四起

a trakubakuban i, mialian aw mialla dra lutung. an penauwa lla dra sabusabungan i, na maradawan tu pillangaw na maranakan muka i drenan. tu panaunauwaw dratu allepatan, dratu uringetran aw dratu kakuwayanan dra lutung. amawna, a trakubakuban i, mikakuwayanan dra tremulag dra lutung. driyama, muka i drenan demawaya dra salletriban. tu dradrimutran dra baabaaw driya na adri mabuli na lutung.

an demadaway dra salletriban i drenan i, adri maisi, adri muwatrai. an tremaull na lutung adri lla muwai mudallep kana salletriban. emiway temedrer. tu tragetreg, tu babarat, tu lalibeng kana salletriban i, malak kadrunu i paliyuliyus kana treliin na kawi. idru i, amau nantu kinaladaman muisatr kana lutung na kawi aw adri lla inedang.

na salletriban tu ikaasatr tu kelawangan i, karuwa musabak a miyadruwa na lutung. tu binetebetan na tatilu na musabak i, tu kawilay dra akanan. na mupatraran i, tu palipelipanay kana kawi. tu pakeringay dratu lubung kana basikaw. na trakubakuban kadru i dawill semaranap. an mutani na tatilu na pinakeringan dra bulenan i, payas malladram dra ullaya lla mutiyu a lutung aw tu drimutraw na lutung muruma.

an mubasibas na trakubakuban, tu trulagaw pinatray na lutung. idru i, a pakauwaringetr kantu anger kana trakubakuban. an kemudraw pungalangalad i kamawan dra melalingedr. pawawateg i, matrangis dar na maranakan na benabaaw.

merederedek garem idri tu kakuwayanan na mangayangayaw kana trakubakuban. adri mureput pallu garem. amawna, adri lla trematrulag dra lutung dra baabaaw driya a trakubakuban garem. tu dawayaw na daramiyan temuwalutung. tu palipelipay dra traker aw tu trulagaw. adri lla mauka i drenan demawaya dra salletriban na trakubakuban. maulid lla dratu pauwayan dra salletriban. aw mullallemes lla idru na salletriban. garem i, miyadruwa lla na maidrang na malladram driya dratu pauwayan dra salletriban. kamelamuwa meladaladama aw saiguwa demaway na trakubakuban. inaba mullepus mubilin idru na salletriban.

卑南族青少年當魔鬼訓練期，會入山觀察猴群生活，學習猴子的習性，並學習製作陷阱來活捉猴子。陷阱可容納兩隻猴子，陷阱中間垂下長線吊掛食物，猴子進去拉食物時，門就關上。猴子由學弟們輪流餵養，當成朋友一起玩耍。年祭時又把猴子當成假想敵刺殺，在為猴子吟唱祭禱文時，就像在告別親人般難過。

年祭獵猴、刺猴的習俗從未間斷。但現在年祭的猴子用稻草做成，不再獵捕猴子。學習製作陷阱讓青少年傳承這項傳統技藝使能繼續流傳。