monoon na tarako karu sua puka. ’una ucani tupi’i takuripa, monoon kangvang na capici karu isua. natia ka’anʉ tia tarakusa ’inia sua puka, nakai pacʉpʉcʉpʉngʉ pa, kacaraini takuripa makasia, tia uranʉn maku, manasi ’una nguain tamna kʉnʉa, ka’anʉ moravu.
aranai mesua, paira puka marikʉpʉ pʉrʉkʉ karavung musʉ’ʉ na to’unaa takuripa. makasua ka’anʉ cu tia mupacai tikirimi kʉnʉa. paira noo tumatacucu pʉrʉkʉ karavung sua puka ia, timanʉʉn takuripa ’una maripakʉ tamna riang. kesoni cu takuripa: “neni ’esi tumatacucu kʉnʉa?” ka’anʉ marivari sua puka. pacʉpʉngʉ cu takurupa, tamu kakangca ’esi muranʉ ’inia.
’una ucani taniara, ’esi si’icʉpʉ na tarako karu sua puka. timanʉʉn kee ’una ’esi pokarikari. aririanʉn kee, ’unava vo’orua takuripa ’esi parʉ’ʉna mataa tupi’i takuripa. “cucuruana tumatanparu! tupi’i kasu, miseni ’una macakuarʉ kʉnʉa musu?” marivari: “macaraini ’ikua tamu kakangca, marikarʉ cau manʉng tumatacucu kʉnʉa movua ’ikua.”
makasi vo’orua takuripa: “ka’anʉ ku putucucuru! ’akuni purusʉvʉ!” marivari: “koo ku purusʉvʉ kasua. noo iavatuin ia, timanʉʉn maku ’una maripakʉ tamna riang, macuvungu ’una cu kʉnʉa na to’urua maku.” “ka’anʉ pa ku putucucuru, tia ku mon nesi maritarʉ.”
rovana cu, aramia’ʉ cu puka. marisʉ’ʉsʉ’ʉrʉ tina’an mingane cu tikirimi kʉnʉa. cʉ’ʉrʉʉn vo’orua takuripa, tatia pakʉ mingane na kakangca, cucuru arakicacʉ! isuava kisaa tupi’i takuripa cau manʉng. makacang manguru! koo cu pakisapatʉ tumatuturu tupi’i takuripa.
koo miaranau, niarivici cu puka macakuarʉ kʉnʉa. tumatimana tupi’i takuripa, arisusunʉʉn kee vo’orua takuripa, nakai ’akia marivari. takacicini cu kumakʉnʉ. pacʉpʉngʉ: “kamʉcʉ tʉni ku cumacʉ’ʉra, makasuin tia cu tʉni cumacʉ’ʉra capai paira muranʉ ’ikua cau manʉng.” cʉ’ʉrʉʉn puka sua tupi’i takuripa, ’esi kipatʉsʉ kumakʉnʉ tinacucu kee pʉrʉkʉ karavung. pacʉpʉngʉ puka: “noo tʉni kasu cumacʉ’ʉra ’ikua, manasʉ tia makacang manguru. imua tupi’i vo’in musu, manʉng kara? aka kara sua na kasua?”.
貓頭鷹住在樹洞中,一隻瞎眼的螢火蟲也住附近。貓頭鷹原本不想理他,但心想這眼瞎的螢火蟲挺可憐的,決定找食物送給他,使不致餓肚子。貓頭鷹經常收集蝸牛給螢火蟲,但從不表明自己是誰。螢火蟲心想是天神派好人幫助牠!有新來的螢火蟲發現那送食物的竟是恐怖的貓頭鷹,趕緊逃走。貓頭鷹帶來豐富的晚餐,送給眼瞎的螢火蟲。心想著,但願我能看見經常幫助我的好人。貓頭鷹看著螢火蟲,也想著,如果你看得到我,應該會驚嚇地逃走吧!