朗聲四起

la’i ta Tayan micu hani ga nyu tkba m’was biru kwara, iyat ta ba’un malax posa m’was biru ku micu hani. baha mcwa, maha thoyay ta mkyanux knxan na micu hani ga, siga piyux ba’un ta yaw na babaw uraw hani. ana knxan ta lela ga, kwara bkis Tayan ga, piyux ci ba’un naha yaw nku knxan na Tayan uyi. nanu yaca, tkba ta maha kenu mkyanux ku la’i na Tayan micu hani ga, aring lela ru tehok soni ga, utux ci tu’iy nya, siga kahun sku tkba yaw na babaw uraw hani.

la’i na Tayan lela ga, kahun sku uba naha mwah tkba yaw na knxan na Tayan lela. pwasan naha ga sali, mayah, rgyax, gong ru llyung. tkba’an naha kwara yaw na knxan lela ga, nanu ku tminun pala, tminun kesi ru tokan, yaw na mnayang ru m’omah, yaw na kmalup ksinu ru cmi t’oya, yaw na kwara gaga knxan na Tayan.

la’i na Tayan micu hani lga, kahun naha psba biru mwah tkba sku yaw na knxan micu hani. pwasan biru naha ga iyat nanak maki sali, mayah, rgyax, gong ru llyung, maki utux hopa ci knle naha sali, mosa m’otu m’was kya ku kwara la’i Tayan micu. tkba’an naha yaw na knxan micu hani ga, iyat yaw na tminun, iyat yaw na mnayang ru m’omah, iyat yaw na kmalup ksinu ru cmi t’oya, kyan nanak yaw na knxan babaw uraw micu hani. kwara tkba’an naha yaw na knxan micu hani ga, iyat naha su’un m’was kwara ku maki pwasan biru na la’i cikuy, siga mkaraw ta m’was biru, miyuk ta ini ptna hopa kawas na pwasan biru.

nanu yaca ku, ita kwara la’i na Tayan micu hani ga, khopa hayi lungan ta, theya hayi tu’i ta, bawi hayi knita ta, iyik hayi lungun ta. mosa ta ble mkyanux knxan ta micu hani ga, siga lokah ta m’was biru. lokah ta tkba m’was biru ga, siga mkaraw ta ini tna hopa kawas na pwasan biru. ini ta karaw m’was pwasan biru lga, mosa siy tehok kya nanak ku knb’an ta yaw na knxan micu hani. nanu yaca ku, iyat ta hngi tkba m’was biru, lokah ta mosa mkaraw loyi ku hopa pwasan biru.

小孩接受教育來具備知識，先祖也學習生活知識。過去是從父母學習知識，家、田地、山林、河川是學校。知識包括編織、編製背籃、獵袋，開墾和種植，狩獵和放陷阱及泰雅的倫理訓誡。

現在是從老師學習知識，於教室學習現代的知識，要繼續到不同年齡層的學校就讀。現代泰雅子女，要心胸寬廣，有目標，更高的眼光，沈穩的心志。要活在現代，只有勤奮升學，若不升學，現代生活知識就會停止。不要停止讀書學習，到不同年齡層的學校讀書。