朗聲四起

la’i ta Tayal micu hani ga nyu tkba’ m’was biru kwara, iyat ta ba’un malax posa m’was biru ku la’i ta micu hani la. baha mcwa, mosa ta thoyay m’yanux knxan ta micu hani ga, siga piyux ba’un ta yaw na babaw uraw hani. ana maki knxan ta lela uyi ga, kwara bkis ta Tayal ga, piyux ci ba’un naha yaw nku knxan na babaw uraw na Tayal uyi. nanu yaca ku, tkba’ ta maha kenu m’yanux ku kwara la’i Tayal micu hani ga, aring lela ru tehhok micu hani, utux ci tu’iy nya, siga kahun tkba’ m’was yaw na babaw uraw hani kwara.

la’i ta Tayal lela heya ga, kahun naha uba uya mwah tkba’ yaw na knxan babaw uraw lela. pwasan biru naha ga sali, mayah, rgyax, gong ru llyung. tkba’an naha kwara yaw na knxan lela ga, tminun pala, tminun kesi ru tokan, yaw na mnayang ru m’omah, yaw na kmalup ru cmi t’oya, yaw na kwara gaga Tayal.

la’i ta Tayal micu hani lga, kahun naha psba biru mwah tkba’ yaw na knxan babaw uraw micu hani. pwasan biru naha ga iyat nanak maki sali, mayah, rgyax, gong ru llyung la, maki utux hopa ci knle naha sali, mosa m’otu m’was kya kwara la’i Tayal micu. tkba’an naha kwara yaw na knxan babaw uraw micu hani ga, iyat nku yaw na tminun, iyat nku yaw na mnayang ru m’omah, iyat nku yaw na kmalup ru cmi t’oya, maki nanak kwara yaw na knxan babaw uraw micu hani. kwara pwasan naha yaw na knxan babaw uraw micu hani ga, iyat naha su’un m’was kwara maki te pwasan biru na la’i cikuy, siga mkaraw ta m’was biru, miyuk ta ini ptna hopa kawas na pwasan biru.

過去是從父母親學習生活知識，學校就是家裡、田地、山林、溪流與河川。要學習的生活知識，包括編織布匹、編製背籃、獵袋，學開墾和種植物，學狩獵和放陷阱，學習泰雅社會的倫理訓誡。

現代的泰雅人是從老師們學習生活知識。集中於讀書學習所有生活知識，是關於現代世界的生活知識，並且要繼續升學，到不同年齡層的學校去就讀。要能好好的生活在現今世代，只有勤奮讀書，不斷升學就讀。