朗聲四起

I panan nu cacudadan ira kiya masilsilay:tu a abinung atu kilang. I lanu’ nira kilang i, sabangcal sa kira baru a macelak, teli’sa a melawan ku cacudadan nu niyam. I ruma a bacali satu, ira ku mamelawan tu maama;an a picudadan, u tin-naw atu masamaanay a sasalamaan, matiya u alumanay ku tamdaw a paluma’an. Salipahak sa kaku a micudad tu remi’ami’ad, itila aluman ku cabay nu maku, malecapu kami a micudad, i pipahanhanan namicudad, saruyaruy sa kami a mihulul, a micakay tu mamedacen, tangasa satu i kalahukan malecapu a keman tu sakalahuk, herek sa namalahuk i, henaba satu kami amin a mabuti i sapad nu tireng. Suelinay i cacudadan, pihaceng a matengil ku suni’ nira nipi’asip tu cudad, u radiw atu tawa i cacudadan. Saremi’ami’adsa kami a micudad, milaylaytu tireng atu minanam tu sakabana’ tu tamdaw atu sakangudu a demak.

U sakalipahakan a nananaman itini i, u sapilaylaytu tireng atu radiw , u ka’ulahan nu maku a minanam. Anu sibuduy tu kaku, tu sapilaylay a buduy i, satanektek saan ku tireng, ma’ulah kaku a mimali, a mabekac tu mililiay, anu milili a mabekac u salikulay kaku a mamabekac, ira nipabesbes nu maku, atu belung nu kaput a pakakilemel, u saayaway tu kaku a tangasa. Tuna mahaen matenes a lipahak ku balucu’tu remi’ami’ad. I karemadiwan satu, caay kanca patalaayawi nu pasebana’ay kaku a palingatu a pangiha a paradiw tu kaput, u rumasatu pasacacay han kaku a remadiw tu ma:an a radiwan, sisa mahemek ku kaput tu kapah nu radiw nu maku. Masuni satu ku pahanhanan a radiw, sakalamkam satu wamin a misiremud tu cudad a pakay kabang, herek a palesimet mikabang tu kami a maruyaruy a taluma’. Tangasa satu i pana nu cacudadan, ira na’un sananay a mucerem a cidal, sa atipuling saan ku cengel i kakarayan, i aayaw nu pana nira dadahalay a lalan nu cacudadan, sadit saan kira cengel a mamelaw. Pihaceng ku ’ulah nu maku, tina sabangcal sananay a cacudadan. U kangalayan nu maku a saremiremi’ad a tayni i cacudadan, a minanam tu masamaanay a nananaman. Atu salipahak sananay a ma’urip itini i picudadan a kaput atu cabay amin.

描述對校園生活的喜愛。校園環境美麗，有椰子樹、杜鵑花、圖書館及各項設施。每天快樂上學，和朋友一起學習、玩耍、吃午餐及午休，最喜歡體育課和音樂課，在課堂上表現活躍。下課時，夕陽灑在校園中，更增添校園的美麗，表達了對校園的深厚感情。