朗聲四起

’e coua’toana, ahoi ne noana’o la peesi honci navconga ’omo conoemoo, ho i’omo nanat’ot’ohaesa, honci yutasufku tamo peisia, ohela yainca to mamameoi koa mcoi.

’e coua’toana homo tovcongʉ, lea na’nosi hioa to emoo to hahocngʉ, i’ola hia mayo to mamespingi mo aʉlʉ pio no mav’ov’o, pantola asvʉta ho mion’a ngangho’ʉ, pantola yupamouski, zou yahngʉyʉ ’o leahen’a hioa to nia noana’o. ne noana’o, homo paepovcongʉ ’e cou, ’upena honci mav’ov’o nante hioa, ’o tee yahngʉyʉ lea conino smouyu’ho to emi no cou, cono peosona ci simeo ho ito ufi, la hafa sʉfeʉngnʉ to hiesi no yahngʉyʉ, ho poa po’toivneni to mameoi to emoo to mamespingi, ’ola fii tomo tuyu cila po’toivneni ci macucuma, ’o emi lea faeni to hicu no noyaeo’ca, ’o simeo, la faeni to noyaeo’ca ta hahocngʉ, ’o ufi, la faeni tola aʉt’ʉcʉ ta maamespingi ci hicu. ho isicu aepʉnga hioa na eni, tenac’u meelʉ yaabobonʉ, ho micu oepʉngʉ, ’o mamespingi tenac’u fiho to hahocngʉ ho maine’e. ac’ʉhʉ tan’e, micu aʉlʉ ʉmnʉ ci navconga.

’o mamespingi lea miptuhi to emoo to hahocngʉ, tasicu hafa ’o hahocngʉ ho maine’e to emoosi to mamespingi, ’o hahocngʉ tenac’u yonto emoo to mamespingi ho fifiho, ’o hia nona’o hola fifiho, tasic’o aiti to maameoi to mamespingi na ntesi.

hia nona’o. panto leac’o pio no feohʉ, hocu ’osni meelʉ maine’e to emoo to hahocngʉ, pantola aʉlʉ toiemoha tenac’u petohʉyʉ meelʉ maine’e. ’o koa yainca fifiho ’e hahocngʉ, lea epa’teni to maameoi to mamespingi ’ola hia peisaseolʉ ho hia luavaica homo yaahioa.

ho isi yainca yupa mouski, ’e hahocngʉ honci yaa ohaesa no mamespingi, tena yupa esansana ho poa vcongneni to ohaesa no hahocngʉ to mamespingi. 

ahoi ne mohcu yʉmeʉmʉ ta hosa ’o kiokai, mo na’no aezuhu ’ola hia paepovcongʉ maitan’e, maito meesi ta kiokai, micu na’nosi sʉ’eʉsʉ tomo fʉecʉ’ia ci yʉsʉ ’o mamespingi, lea acʉhʉ uhto kiokai ’e mao’oahngʉ, titho to hia meesi to kiokai ho peeseni ’ete navconga ci yu’fafoinana. ho isicu aepʉnga ’e meesi ta kiokai tenac’u ’izuhu uhto tee yoni bonʉ ho yaabobonʉ, maica isicu aepʉnga ’e paepovcongʉ maitan’e.

’upena homo yupa h’unasi ne noana’o ’ola hia tovcongʉ maitan’e, mioc’o coni ’o o’a isi peela teoezuhi ci a’a’ausna, zou o’atee ahtu meelʉ navconga ’omo nanat’ot’ohaesa, isi kuici peisia ’emo maica ci a’a’ausna ac’ʉhʉ maitan’e.

鄒族傳統婚姻的禁忌是同姓及聯氏族不得通婚，若觸犯這禁忌，男方必不得善終。婚姻通常由男方主持，有指腹為婚、交換婚及正規提親。儀式分為提親、訂婚及喜宴等儀式。男方都要準備豬肉一串、年糕及小米酒，在訂婚當天一早送到女方家，由德高望重的耆老接受並做祭祀的貢祭儀式。儀式完成後舉行筵席，兩人正式成為夫妻。新娘在男方家住一星期便帶男方回娘家做苦力。

西方宗教傳入後，婚姻儀式也隨之改變，不能改變的是同姓不得通婚。