朗聲四起

Isia mabahis daingaz a vali tu talabal, aiza tu hanian, minsuma pasisiklung tanmazav-mazav tu babutahdung silukmu amin sia tasa tu lukisdaingaz cia mintunavung, isia lukis tu andingalan hai aiza nitu muav madaing tu aul, aiza duma babu isia aul cia suhazsuhaz sia danum cia tal-isuh maza duma hai isia navungcia singunguh masabah.

Isian mas manungsiv at kaupa mas danum cia tu hai-ius-hai-ius sin mas siut-siut ma-iv-iv tu luvluv, cisha minsuma pasisasauluk tu ak’ak tu’i’ia panadadaza amin sia lukisdaingaz cia tu’i’ia tu ak’ak, at susulpakun nanga pani at kintataki mimisah panasiana taki isah sia liputnih singunguh masabah babu tu lutbu, aiza tu pia a ak’ak kunastu sia aul cia huud mas danum talisuh.

Tudipa babu hai angkailasun mas idadaza sia lukis patahusngi tu’i’ia tu ak’ak, babu hai usakan mas mahansu daingaz tu taki, amushangsia kintakian mas idadaza sia lukis tu ak’ak, min’anuhua babu tupa mas ak’ak tu; ui~ui, mavia kamu tu sakulaz mazami tu babu i? antalam a ak’ak tupa tu; babutahdung muu tu babu a,mahansu, kuisnah, imua dangian hai aza tu taki, isah, mahansudaingaz sakun, kailakinang kamu napatazun mas bunun maun, tubasus babu tupa tu; matahdung amin kamu, kuisnah amin kamu, aupa maun kamu mas takilibus minataz mininpuhin tu cici, nia bunun mazima maun mas imu tu cici aupa makuang kaunun mutah mais minaun, ukas iuvung, anis takilibus tu sinaipuk hai nii amin maun, ak’ak tudip tu tai’aza mas itu babu sintubas tu hailinga hai minkaz’av maisidip naia pasisiskun sangkuaskus kusbai mai’aupa sia duma tu ludun.

Tudip hai manungsivin, musuhis a babu singu’nguh liputnih masabah sausia muhaivin a vali at min anuhu in naia pasisiskun manaskal cishahainaz mudan kusia inaicia tu luluman babu na maun in mas pinit’sanavan tu haising.

Mahtu kata paisnasaincin tu hansiap mathas haiap tu; ak’ak mas babu hai maszang amin tu matahdung, haitu ak’ak hai maun mas taimazav’mazav sialibus mininataz min-ninpuh in at mahansuin sakun tu cici, ukan mas nanu-dangian tu lumah.

一群流浪黑毛豬在樹下休息，有的在河裡戲水、有的睡覺。突然一群烏鴉停在樹上，不斷拍翅並排泄，弄得豬群滿身。豬被臭味與騷動吵醒，質問烏鴉為何如此無禮。烏鴉嘲笑豬又髒又臭、環境差、還會被人吃。豬群反駁，指出烏鴉也黑，因吃腐肉而更臭；人不吃烏鴉只是因為肉難吃、無營養，連野獸都不想碰。烏鴉羞愧不已，匆忙飛走。

指責他人前要先檢視自己，不要像烏鴉一樣貶低別人反而自取其辱。無論什麼族群，都應彼此尊重、相愛。