ray mama:ongan hito’, ma:ong pasa’se’el ray minrawko’an ki pinatiyayan, ’ima sem’el laha:aw ray bangol ’i:zo’, mama:ongan ka kin’ibabaw potngor ray mae’iyaeh a kiri:, So: homoroko’ sowiti’, mae’iyaeh nak ’ima hoSa:il ’okay kita’ ’ani ila. So: ma:ong temne’ ila ’isa:a’ mowa:i’ tima:ong, ray ’ima homawan ’oka’ ka mae’iyaeh mowa:i’ ila hini.

hayza’ ’ima baba:aw rowaSek ’aehae’ halpaw, rengreng So papi sowiti’ nanaw ka howaw ma’ ngangaroehngaroeh ila, ray ’aehae’ ’ima ’iyaSamSem, minkoringan minbalae’ ila, mowa:i’ ray ’ima SipSipa’an sowiti’ minrawko’an, ray ’ima so’so’i’an mama:ongan makSa’ ’okay Sahoero: ani ila ka mae’iyaeh. ririm’aenan rima’ komobae:aeh ka ’aehae’ tatini’ mae’iyaeh, to:o’ hila:an to:o’ kin hae:wan mam komi:im, ma:ong winaSak ’ino’a:aw ila kinmowahil, naka bato’ ’ima Sa:boe’ ray wasal ’okay bazae’ ani sowiti’. rima’ ’inkahoelan somingozaw, ma’ ’ima’ rima’ kansiya ’aehael taew’an komi:im, minoSa’ ’oyaeh kala ’aeh’aehael ma’ Sa’ ’okay kita’, rima’ patilhael ka kinSat ma’ ’okay tihoero: ani. mowa:i’ Sopat ’ilaS kin honaehnge:, ’aehae’ ’ima papongawan tatini’ pa’iSpi’ kamamannra:an nisiya, ray kaSpi’ Sa’, “ So’o ’iyakakita’ ka minkoringan niSo’, So’o Sa’ila’ ray ka tiniShila:an ’ataS langi:, hayza’ ’aehae’ ’ima tatini’ kaehoy bana:, mari’ ka panga’ pa:pahikoren, ka bana: pahikor toetoeh ray ma:ong ’i:zo’, isa:a’ ’oe’oe: So monto:ol niSo’ minkoringan a raro:o’, ’isa:a’ siya ’am kas’oehaez ila. ”

homawan ila, ’asang mae’iyaeh komoSa’ mama:ongan mina ’ima hayza’ ka kino’azem, ’izi’ pa’aew’aewhay ma’ ’izi’ noka kaehoy toetoeh laha:aw ’i:zo’, ’aewhay pakbi’i: ’ima honay ’i:zo’ ka mintatini’an, kinoSa’ ’aehae’ halapaw ma’oe’oe’ ’izi’ a tomal ’oSa’ ray mama:ongan langi:, hini mina noka tatini’ pina’alowa’an.

大坪聚落裡山蕨長遍田野，山蕨叢高度約到人的腰部，稍微半蹲就看不見人。長嫩芽時節有人會來採集，平時鮮有人跡。

有對新婚夫妻常為小事吵假，有天傍晚，妻子哭著跑到山蕨裡，瞬間不見蹤影。家人找了三天三夜，仍無聲無息。也曾經到娘家詢問，到她兄弟姊妹家裡找、還到親戚家裡都說沒看見，報警也找不到。

事過四個月，一名白髮老翁託夢給丈夫，他說：「想見令夫人就到懸崖邊，那裡有棵古榆樹，取其枝椏為拐杖，戳入山蕨裡喚夫人名字三聲就會出現。」

事後，族人認為山蕨有靈氣，不可隨意破壞，以免觸怒掩藏其間的百步蛇。老人交代，夫妻吵架也不能走到山蕨叢旁。