朗聲四起

kamatortoroe’ somingozaw Sa’, “ ’ampowa’ So’o Sin kas’amesen Sinrahoe’? ” ya:o tiSkobae:oeh, “ yako SaySiyat ”. ma’an kinra:am noka SaySiyat a Sinrahoe’ ’ima maynonak, ’inaray kaSnay’oes’oeso’an, hinhinbetelan kaehoy , kawaS kinita’an rino:o’, ma’ hayza’ kamapa’owaz Sinrahoe’ ’aza’, ’omowaz noka SaySiyat a kaspengan.

noka SaySiyat Sinrahoe’ hayza’ titiyon, baba:i’, Sa:wan, kas’ames, kaybaybaw, tawtawazay, minrakeS, tataysi’, hayawan, karkarang, Sayna’ase:, tanohila:, kamlala:i’, botbotol, hayza’ roSa’ Sinrahoe’ karkaramo’ ki tabtabilaS hawka’ ila.

SaySiyat ’ima tani yaba’ a kino’asangan, kamamanra:an ’o’owa’ ’ima hinbasez koSa’en rompa: ka boehoe:, SikoSa’ rompa: ila ’aehae’ kama’alep ki nom papanae’ wa’is. So: minatini’ a tomal kamamanra:an, taSilotor ka ’in baki’ a raro:o’, hikor porotor ka ’in yaba’ a raro:o’, nak So: baki’ Sin ’itihin, yaba’ Sin ta:oson,  kamamanra:an ’o’owa’ Si ro:o’ hi ’itih a ta:os, minayti’ mari’ ila ka ’in baki’a Sapang ’aehael o ’ima langi: ’in noka tatini’ a raro:o’.

minkoringan ’o’owa’ hinbasez koSa’en kama lihapoy talsapal ka minahael, Si koSa’ hiza’ ’o’owa’ mayhael nom pama’ ray kin’i’iyaeh kano’kano’ howaw, ti’ti’oe:oe’, komaehoy, tomalek pakbaba:ok, Somahoe’ pakrikrika: ka ’aehae’ taew’an, minkoringan a kak’i’iyaeh nak ’abo’ kin hororay. So: minatini’ a tomal minkoringan, mari’ ka ’in koko’ a raro:o’, hingha’ porotor ka ’in yaba’ a raro:o’, koko’ Sin ’okayen, yaba’ Sin kalihin, Siro:o’ hi ’okay a kalih, minayti’ mari’ ila ka ’in baki' a Sapang ’aehael o ’ima langi: ila noka tatini’ a raro:o’, hinra:iy tabin tatini’ ma’ ’okik sapih ka raro:o’.

kakhayza’an ray ’asang So: mae’iyaeh somingozaw Sa’, “ So’o hiya? ” panabihin ka ’in yaba’a raro:o’, baki’ hiya’, koko’ hiya’, kano’ Sinrahoe’, ma’ ra:am ila So’o ’in hiya’a korkoring, Say ’ino’ mae’iyaeh. ’isahini ila, ’ana haysiya tani kaspengan Sinrahoe’ ki raro:o’, maySoSo:aw manogwip ila ka “ ramo’ ki kaehma’ ”, So’o hiya’ a tomal? haSa’ ila ka tatini’, ngota: ila ka ngabas, malnopizpiza’ ila ka’alnoSaySiyat, ’ana nak’hiza’, ’ihoero: a tomal ’asang nak’ino’ sin’elan, ’inay’ino’ ’ima mabasez, paksopaloy ka ’inoe’oe: “ yako SaySiyat ”.

 

「為何姓根？」

賽夏族姓氏十分特別，多以動物、植物、天文或自然現象命名，也有負責傳統祭儀的司祭姓氏，如titiyon、baba:i’、Sa:wan等，目前有兩個姓氏已消失。男嬰出生象徵家族力量增加，長子承祖父名並聯結父親名，如祖父為’itih、父為ta:os，男嬰名為’itih a ta:os。次子起則承叔伯輩名字。女嬰被視為揹柴火者，代表生活支柱，長女承祖母名加上父名，如’okay a kalih，之後的女兒承姑輩名，嫁人也不改名。