朗聲四起

Maaca acang inak a mantan manau’az, maca iha’an azak acang a manahip sala ca is’ang, maupa i masvala ca iniqumican. Madia amin ca manau’az a pinismantukan.

Matu uva’azang azak a, maqanciap tu, maca nataunahanin minqamisan, ihan tunganin makulut is paaz a, madia sala ca tumatu mucais tal’ia, kapuaq, kalaac, misnahaan masanglav minmabulav sauhaan madangqac, masanlautu ca laac. Manahip sala azam a uvava’az i, namaqtu haiza ca kaunun a tumatu. Mantan manahip sala ca is’ang i nam maca mina’unin is tumatu.

Maca kakachunis tanabal a, madangqacin ca mumulac, muskun azam is duma a uvava’az matapul is mumulac, altupat madia ca duli, qaitu tis’uni asat utapulas mumulac nakaunun a, ni azam mapising is tisduli. Haiza amin ca masantaqdungin a kuncikmun, ni azam amin mapising minkaun han lukic matapul is laac is kuncikmun. Matas’i azam is takan tuna padangi’as tinapul i nam a mumulac ciin kuncikmun, maca uladingunin ca mumulac ciin kuncikmun han kumbu is takan a, nakuci’anin lukic kisbazu pindanum, nasicupcupunin quu ca sinbazu ka mumulac ciin kuncikmun, mantan azam manahip sala maca mina’unin, maupa i namindangqac a ngulus i nam.

Maca taunahanin tanabal, matan mabaqaic sala ca diqanin a, anaqat asahala azam kavila is danum, qaitu mapising azam naludaqus tama tina. Utu kamiming azam pakikilim munhan vaqlac kavila is danum. Maqanglac azam paluntan tungkumbu is danum kilim is sinpacqal a lakda. Maca mudanin azam mulumaq a, pinhivain azam siza is dalaq maqusqus han hubung, nani ca tama tina maqanciap tu sihan azam vaqlac, qaitu maiza tuza ca inuskunan naam a uvava’az kalulus tama tina ha napanakan.

Maca taunahanin makazhav a diqanin, tanpipia azam patangkaka’us qanvang, mama’us muut ca qanvang a, nakavivila azam pasinap ciin pisqacibang. Muskun amin azam malqatu, kikilim is kaunun a mama’az. Mantan maliscial  ca is’ang han acang ti miqumic.

Maca pismantuk azak is iniqumican i naak han acang a, mantan madia ca macial cin kanahipun a liniqaiban.

我從小就在部落長大。記憶中每到過完年後，在收割完稻子的田裡面，小番茄就會開花結果！而接近夏天時，我們就去採野生草莓和桑椹，放在竹筒裡，用木棒打碎後品嘗其汁液！到了夏天則相約去玩水。並潛入水裡面，尋找之前做記號的石頭。避免父母親知道我們有去玩水而遭受處罰，所以要回家前，我們會在身上先抹上泥土。到了秋天，我們會去放牛；牛兒們在吃草，我們玩耍，玩累了，就去找些可食用的植物。如今回想非常美好的回憶！