朗聲四起

kana samawan diya kani i Taiwan mu, uniyan da kemawan kana Pinuyumayan salaw da sahar mi’apuc. tu ’apuc na Pinuyumayan mu, ’inupid pinucungucungulr na ’apuc, salaw kana vulay nu mena’u ta.

na Pinuyumayan tu kakudayan nu semasahar mu, mau na kadu diya i dekalr na cau mu, na vavayan lra, na ma’inayan lra, na lralrakan lra, na dawdawan lra mu, karemi’apuc tu canguru’ mapaya.

nu adi lra mipinadangan, nu mi’apuc diya ulra lra tu kurekadadadam da kurelrang kana ’amiyan kema tu pauwayan. na melri ta samauwan di nu mi’apuc diya kurelrang da sa’ur, nu mena’u ta mu, salaw sadeku ta anger inta na penalalisi, ini na ’inupid na ’apuc nu ta pi’apucaw mu, kamawan nintu lima da temuwamuwan, karuwa ta kina’u kanta temuwamuwan di paka’inava kanta.

ini na ’inupidan na ’apuc adi mawmau kemadu, nantu kakuwayanan, ulra diya duma atu kapalalisiyan na padangal tu pauwayan. nani na valisen na awac diya na muicaicas kana venangeangesar mu, nu padadila’ nintu ’aliyan mutupaadulunay kanantu valisen na vekal, natu tinutaina mu, tuy pavalisaw lra idu nantu pini’apuc na calunan di puvavekal kana ’inupid na ka’apucan lra, ini na ikakuda mu, kamawan da puludus lra tuy ikavalisen kema, kemay kanidu lra yawa mulavaka kana vangesaran di micepa lra ’emiyar kanta dinekalranan.

na vavayan i dekalr, tu semangalan mu, kadu i laluwanan pu’apuc kana kemay calun na ma’inayan.

ini na pu’apucan mu, say nu pakaetiman nanta samauwan mu, adiadi padulu datu ’apuc na kuwaravakan, ini mu, mau nanta kakuwayanan na itaturusan i dekalr. pakaareked data anger na kuwaravakan kema di, saruma’enan ta lra kema tu pauwayan di, pakadalram diya kana temuwamuwan. nu puwaduk ta diya da inuwadukan mu, kemadu adi a uniyan idu na pini’apucan i canguru’.

原住民族群中，卑南族是個愛花的民族。代表「榮耀象徵及能力肯定」。在祭儀或喜慶，花環是不可或缺。從女到男，從老到幼，沒有不戴花環。即便沒穿傳統服裝，只戴上花環，卑南族特有的靈氣，自然而然的附於其身。部落的好友當他戴上花環，族人祝福如泉湧般湧進，花環如祖靈的雙手，會輕撫著、祝福著…。

生命禮儀中，當青少年步入青年期，由耆老為他換上新褲，取下草環戴上鮮花，以示揮別少年期，正式步入青年，擔負重責任務來保家衛國。