朗聲四起

ini na kiyakarunan kana dadawain mu, marekasadu lra na kikay na dinawayan, vunuras lra kananta dadawain na kinaawac diya, semalra, ta pulrepusaw, adiya ta malalup!

ta tikelruwan na ma’ida’idang i Kasavakan mu, mau tu ivilin na temuwamuwan datu pucacungulran da dadawain, di mau lra ini na pulrepus kanta na palalisiyan data ka’amiyanan! alra nu ’ami’ami diya nu katikelruwanan mu, maruwa puluma’ da kaduwaduwan na dinekalranan kurelrang knini na kasaharan, palru harem ini na katikelruwanan pida lra leman tu ’ami inelrangan adi diya mureput.

nanta tikelruwan tu ika’idang, kemay lusu kinapatikeder tu ikaacas mararesan lra kana turuwa lawangan a ruma’ , ulra diya na tinatukud, tu dinawayan, kemay kana ki’uway, kikawayan, na tinareawac parahan, adi micaheceh pakiwalay, mawmau na ’uway tu vinetevet di maruwa patikedir.

nahni na dinadaway pararahan datu kaacasan na tikelruwan, di nahni na dinadununan mu, ulra tu pinipauwayan peniya, tatena’ da ma’idang tu ikadalram datu wadawayan !

aymu, ini na karuwa kiseker muicas kanantu ikaacas na tikelruwan di tu ikakuwalengan remekedang dimikes tu pinilimayan mu, kaytayan lra na muwai kipanadam, di ini na pa’eceng na kapalisiyanan na wari di karacaracang na panadaman na kiyakarunan da tikelruwan mu, kinalrikeci lra kikarun harem, inasalr lra harem kana uniyan da cau kikarun kana wariwari diya.   

ini na kinaawacanan na dadawayan na kiyakarunan mu, salaw mipauwayan, melri nu patiwlayan, ta kapadangalaw, ta piangeraw nahni nanta cungucungulran na kiyakarunan, kana kadu diya na sayhu panadam patakesi kanta na ma’idangan mu, ta pulrepusaw tu pinarevuwa’ data temuwamuwan.

建和的大鞦韆是祖先傳承下來的傳統工藝，有大鞦韆，我們才保有鞦韆慶典的年祭，每逢年祭，總是喚回不少旅居在外的族人回鄉參加盛會，鞦韆祭儀延傳至今也有百年！從鞦韆架起高度相當於三層樓高的主架，還有橫干支架，製作過程從材料的取得皆以最原始的搭建方式，不用釘子僅以竹子和藤條綑綁、架設，這些鞦韆的製作，每個環節都有其特定的製作工法及意涵與學問！

所幸，我們沒有因其他文化的介入，而失去了傳統工藝原有的文化之根啊！