朗聲四起
ulra ku suwan a sasaya na ’ude’udem, ku pungadanay kani ‘‘Kilengan’’ nangku inacevungan a kuku diya kana pupalidingan i kungkuwan.
adu kana wari muraruma’ mi lra i kungkuwan mu, mena’u ku lra mangesenges diya kadu i pupalidingan, maulep lra awlra di adi lra pakakuwa macangis, mukuwa ku similruma da danum pa’au kantaw, tu piyayaw ’emau, adi diya pakaruwa kemaku. uri awa ku diya similruma da danum mu, duwa lra i nani kituluda kanku uwaruma’, kimisasaki ku kani nani da adain puruma’ kanini na kuku. adi muwai i nani kana ulra diya duwaya a suwan i ruma’ kema di, likudan lra adi pakarengay kaningku, niyam adayaw lra venaaw.
ingku di i wadi na vavayan, mau naniyam kangidayan ini na kuku, kana wariwari diya mukasa mi malihilihi, saynu mudawilr mi kurelrang kaniyam mudangidangi,. salaw mukinger di sayhu anger.
aymu ulra saya wari puicas kaniyam mukuwa i kungkuwan i mulri na vavayan mu, kurelrang muicas i likudan kana tolaku, adi mi madalram da
mutani aydan ini Kilengan kana tolaku, di marevuliyas diya maya’ i mulri kantaw mu, adi lra pakaaya’, kemay kanidu maayaaya’ mi lra kana wariwari diya, kana adi mi lra acacevung mu, salaw ku sadu anger, mareanger ku da lramu savulaw awlra, di kitenged awlra, lramu kici’ci’ lra da paliding i dadalan kana muraruma’ kema ku, kemay kanidu marayas ku tumungutungur i dadalan, munu adi pakauruma’ tu nanayan kema ku.
sa’ami lra di, adi mi lra mayamaya’ kantaw, aymu, talrima ku kani mulri da karuwa diya acevung i dadalan kema ku, ku sare’edan ku pilralrangaw i wadilri na vavayan mukuwa mi i dadalan mavinavina kani Kilengan.
lramu lraman lra na icas kaniyam awlra, di tivutivus mupana kani i sulrasulray, mena’u ku kantaw adu mu, payas ku kemsis, macangis ku kanangku semangalan, ku arecaw kemapuc i Kilengan, intaw mu, adi madiyadi pahiwahiw datu ikur tu semangal mena’u kaniyam awlra, tatena’ ku misemangalan milrayuwan kema ku.