朗聲四起

Kndusan kngkingal seejiq o qulung niqan kingal, dha, tru uxay uri o niqan egu bi ka ssluun kska lhbun. Saw ka smulu ta embiyax hiyi, smulu ta niqan ana manu knklaan, tay saw sblaiq bi ka tnsapah.

Smulu ta embiyax hiyi siida, asi ta ka qmlahang nanaq hiyi. Laqi meuyas o iya imah sinaw, iya ekan puqan, iya khmuc mkan ni mhguc ini klai uuqun. Ini dhuq mgriq rulu ka hngkwasan na o, iya bi tlamay mgriq rulu uri. Yasa psliq hiyi ni uxay dungus ddaun ka saw nii.

Mnsa rmngaw ka rudan alang, “uxay saw naqih ka sinaw ksun, rudan sbiyaw o ida dha sparun bi qmita ka sinaw, ini khmuc mimah sinaw ka rudan wah! Asi ka niqan mstrung ka tnsapah, niqan ka spuan muda paru qpahun dealang, uxay uri o dhuq jiyax smiyan do, meiyah tuhuy sapah ka pnaah eseisil alang na dadal, lupung ni ddangi, kiya ka tduwa mimah cikuh snalu nanaq sinaw ”.

“Seuxal mmowsa lmiqu tmsamac siida ka dsnaw o, ida prajing tmsinaw sapah ka dqrijil. Yaa bi kdha hari sngayan iyax jiyax do mhada ka sinaw da; Yaa bi kdha hari sngayan iyax jiyax do ida miyah alang ka dsnaw uri da. Manu ka dqrijil sapah o ngalun dha nganguc ka snalu ni qpiun dha ka biyuq sinaw. Pmahun mnsupu musa lmiqu tmsamac dsnaw ni drudan alang ” msa ka rudan alang. Ida saw nii ka knkla kndusan rudan sbiyaw, saw nii mgaya bi ka rudan sbiyaw wah! Kiya ni spruun dha bi qmita ka sinaw siida, ini khmci mimah, ini sliqi mimah uri ka sinaw. Kiya ni sinaw balay ksun dha ka sinaw snalu dha nanaq.

Laqi meuyas patas tgska ga, pklug gisu mdakil ka hiyi siida, saw ka sinaw ni puqan dnii o iya ta bi tlngi. Rmngaw mbbiyax kjiyax ka rudan alang, “ida hbaraw ka wada dsun sinaw mbbiyax seejiq alang dwah! Yasa wana tasaw sinaw ka djilun dha kdjiyax, kika wada asi dsi sinaw da” msa ka rudan alang. Naqih kida saw kiya, kiya ni smulu ku bi qlhangi bi ka hiyi ta nanaq, tay saw musa malu ka kndusan ta mniq babaw dxgal.

每人的心裡一定很多的願望。祈願大家身體健康、充滿智慧、家庭幸福。祈求身體健康之際，我們要先照顧好身體。國中是成長階段，像不要去碰酒、菸。長輩常叮嚀年輕人，希望大家珍惜生命、健康生活。