朗聲四起

a qinaljan nua se payuan namatevetevelj, semanpazangal aravac tua sinikamamamaw i qinaljan a kemudanga.

kemasi kakedriyan tulutuluan tua paqaljai tua tjavavulungan, saka seman paravac tua kakudan a namitatekuan, a i qinaljan a i kinacemkeljan a sengsengan a penuljat, sinikamamamaw a qemacuvung a kipusengsengan; namaya uta nu izua kamanguaq sinikamamamaw uta.

nu izua caucau a ruqilji kata ruramiljan i qinaljan, masan djeli sa masan tjaucikel uta tua qaliqali.

temulu aravac a ramaljemaljeng tu inika tjen a maqilji a maramilj, a maramilj tjasika siyasiyaq saka tja sika sipusipun aya.

izua a milimilingan a tjaucikal a mayatucu: izua ita ruramiljan aravac a vatu, kemasi kedrikedrianan ruramiljan aravac timadju, tjenglai aravac a keman a pakaliyaw, inika pakacengcengceng tua kakanen nimadju.

nu kemakan timadju pacucun sakamayan tua kakanen nua zuma vatu, marekutj tua tjaliyaw a kakanen nuazuma, saka uri masipun tiamadju ayaya sakamayan a kinemnem.

izua ka ita a qadaw, azua vatu natemangpac a pi angalj tua kudrakudral a vutjulj, a cemalivalivat tua pana, kacemalivalivat i ljaviaving tua pana, kinemnemnem a namavarung timadju tu izua qemav tua piniangalj nimadju a vutjalj, vaivaik vaivaik timadju, kacemalivat tua tjakudrang i pana, manu pacun timadju tua kakakaka (qailjungan) nimadju ita zaljum, pinaka izua maljiyan a vatu a natemangpac uta tua tjakudral anan a vutjulj, sa kinemnem timadju tu kavalanga azua i angalj a vutjulj tazua a vatu, matu tjasasanguaq tua ku piniangalj aya, pai saljinga azua vatu tua zua pacucunan a tjakudral anan a vutjulj, pai sa intuluq timadju a sema puzaljuman, a qemav tuazua piniangalj a kudrakudral a vutjulj.

manu neka nuinalap a nema a kemasi puzaljuman, saka azua piniangalj anga nimadju a vutjulj sinikaqaljudj anga uta nua zaljum, a vililjan nekanga nu kinan nimadju a masa ramiljan.

avan a tatuluan nua ramaljemaljeng tu nakuya maqilji a maramilj itjen, tja sikapaulaula a tjaqiljiyan a tjaramiljan siniaya. 

排灣族很重視共享共榮。耆老們教導貪心會讓人損失。

有一個神話故事，一隻狗從小就貪心，牠吃東西時總是大量的吃，從來不滿足，會比較自己與別人的食物，深怕讓自己吃虧。

有一天，這隻狗嘴裡叼著一塊肉過河，看見自己在河中的倒影，以為是另一隻狗叼著更大塊的肉，於是牠丟下嘴裡的肉，縱身撲向那隻狗，去搶牠嘴裡的肉，結果投入水中，沒有抓到那塊肉，卻放了自己嘴裡的肉，落得兩頭都空。

這就是老人家所謂的貪心會讓人損失更重。