朗聲四起

“ akung! pnbu kung sya, ” “ akung kmili cikay suru mu han, mkgak! ” “ akung! kayan cikay knxan slali aw? ” kwara hngayang hani ga mutuw mhtu inlungan mu ru memaw m’as balay.

lnlungun mu ku knki myan ki sway mu Tahus sali ni yutas ga, pyux balay p’asun nya. pnungan mu kay ni yaya ga, aring sami mhtu buwas yaya lga, asa pklahang sami yutas Tuyaw ki yaki Yayut la. ryax s’asa ga wayan tsehu heci ku yaba myan, yaya mu hiya ga mutuw musa pcba kay Tayan ru musa mkbaga biru uziy na. ungat s’yung ku hngi’an naha, loziy ga, rema ungat ku yaba yaya ni yaba mu, pyanga sa klhangan sami ni yutas yaki.

mki sali ni yutas ga pyux ku pin’asan na yaw, ppema sami hi ga mutuw syan sya ni yutas ku kulu ka ppeman myan. kulu hasa ga ’nagan nanak ni yutas sku Lyung Penux ru ’nwahan nya pkbalay sehu heci, kulu hasa ga kinbalay na lcing xinoki, syun sya lga mutuw blay sokan ru smlokah hi. mutuw sami mgnaw ru sobih tl’tu ku sya lga, wahan sami gmiba ni yutas ini ga yaki ru plkusan sami naha la.

bsuyan mu Lahuy hiya ga la’i ni mama mu Kenu. ryax s’asa ga ki miru heci Tayping. mutuw mu snun ru mwah sali lga, mutuw myan tlihan yutas Tuyaw. mbing sami pin’utux na khoni ini ga ruma, hama na patus ini ga puting myan. mutuw myan tlingay msyak ku yutas ru mutuw mgyay, pnangi mtakuy uziy, wiwan na mhu’in ru sami ku itu la ma.

glabang balay ku tetanux sali ni yutas. mutuw nya pmhyun ana nanu yasay, blay galan rami. mwah mhngi bsuyan mu Lahuy lga, mutuw hiya gleng magan sa pazih. pungki, kwihan myan ku nisan hmbku tbihi, hama sa niya sami rmaw yutas yaki magan k’man. txan sami ni yutas lga, s’angun sami nya ru hbyagun sami nya, mutuw sami ’si pkgagaw mgyay.

misu soni ga niya kung rahu ru mgluw yaba yaya myanux tetanux heci la. ana ga llungun mu ku knki myan ki sway mu sali ni yutas ga, snun mu balay yutas yaki mu. musa sami rgyax, txan mu yutas ki yaki, wayan n_gyut n_gyut binkis ru ini thuyay hazi hi naha la, mutuw kung lnglung nanak mkura Yaba Lyutux Kayan maha, khangi balay hi ni yutas yaki mu ki. ana kung musa inu ga snun mu balay sali ni yutas.

阿公！我要喝水，阿公，抓背背！阿公，我要聽故事。我和弟弟Tahus住在阿公家的時候，發生很多讓人喜樂的事。我的爸爸早已經沒有爸爸媽媽了，所以我們是由外公外婆照顧。在外公家有許多歡樂，泡澡時，我們一直玩水；表哥Lahuy來外公家，我們一起捉弄外公Tuyaw，阿公會逃跑或、故意跌倒。

如今跟爸媽一起生活，會想起以前住外公家的日子。現在，他們漸漸變老，身體不像以前健康，心中默默向上帝祈求，請一定要好好看顧他們的身體。