朗聲四起

Itaal cu cunga’ ga tuminun nanak cu siyatu’, hahilaw ka pala’, ru wawwaw ka kagisi’, tawkan, rarakap cu qaqasinug i gawng. bali’ nanak ku kakanayril ku tuminun, tuminun uwiy ku mamaliku, aqih gi ini’ packa ku tininun naha. nanabakis cu cunga’ mamaspat quga maqisu kal ku ulaqi’ na kanayril laga mana’aring kiya makibaq tuminun. makibaq cku tikay ka tinun han, tataykay ku qaraqarax ka sitinun, tiku tininun ga girihiy ru alan cu hahabuk na siyatu’. mutu muwani makibaq cu sapat quga imagal cu kal la ru baq cubalay tuminun la. atuna baq cubalay tuminun laga, tuminun cu siyatu’ ka pasituun la. kiya a mukurakis ka qutux cu imuwag ga wahan tumayi’ na cuquliq. sumiwal ku minqaynut nku mukurakis laga, sabilun naha imuwag i tuminun ku mukurakis.

tuminun cu siyatu’ ka rarasun niya i musa’ cu cuquliq. tuminun cu siyatu na tinwayan, tatuhawak, yayibun, sawrux, sasapat ru sumaqis cu tawyah. tuminun cu siyatu’ na mamalik ru ululaqi’ uwiy. bali siyatu’ nanak ku tinunun, tuminun cu pala’ ka hahilaw uwiy. kiya ku tamamalhul ka pala’ ru hulut ka pala’. mausa’ cu mamaliku ku mukurakis ga manamanama’ tuminun cu payux cu tininun.

cu cunga’ ga mumuwa’ kahabag cu kgi’ ku nanabakis gi tatinun naha. nabakis ku kgi’ laga sa’ingun la ru kamagisan na qagsap. naqarun kamagisan laga magananuka’ ru pugian na wagi’, marngu’ laga kunukaun ru saliun ku bakuwiy niya, payux laga patisaun la. payux ku pintisa’ laga palawsun la ru mahnuk laga paramulun la.magawayay laga cakuun ku way gi hangaun cu a’imag ka magaturakis, matasiq, matanah, magauu’, magyuhibung, makakan ru mauba’. naqarun humangu’ laga paramurun la.kiya kahabag ku way laga qalasayun ru tinunun cu siyatu ru pala’ la.

bali nanak kakanayril ku baq tuminun, kiya nanak ku tuminun na mamaliku. mana’aring makibaq ga mamaspat quga maqisu’ cu kal, pasibaqan naku yaba naha. mana’aring ga musa’ magal cu quwani’ i ragragiyax ru bugubugun cu a’ikhi ki i yamagal siyu’ kina qanarux. pugian han ru marngu’ laga tagaqan cu lihpik ru sitinun cu kagisi’ ru tawkan.

tiku mamaliku ga tuminun na quwani’ cu kagisi’, tawkan, baluku’, ginu’, babaha. tuminun na buwiqa’ cu baluk’, yaq’bun, taka’, kawbu’ ru sagu’. talahuwalun cubalay na Itaal ku gaga na tuminun.

以前泰雅族人會編織衣物、棉被，還有一些器具如背籃和抓河中動物的工具。男女都會編織。女孩在八、九歲時開始編織，學會織布就開始織衣裳。出嫁時會提前織出要帶走的衣物和被毯，整套從襪子、裙子、上衣、肚兜到頭飾；被毯樣式則有挑花和沒有挑花。男孩從八、九歲開始和父親學習編織，去山上拿黃藤編背籃。男人擅長編織各式各樣的器具。泰雅族人十分重視編織的文化。