朗聲四起

Tupa madadaingaz tu masamu ma’asqaz i bunun. Aupa maaq a asqazi a isia qanitu-dikla tu sinkuzakuza.

Qabasang a, mapakasihal dau ka bunun miqumis, niang maqansiap tu ma’aq a tupaun tu dikla. Manaskal dau ka Diqanin saduu tu mapakasihla a inastu ti tu bunun miniqumis.

Haiza tas’a qanian, nii dau ka qanitu-dikla manaskal munhaan Diqanin tu tanangaus. Tupa dau tu: “Uka’in inaak a kuzkuzaun inastu ta, naupa ki mapakasihal a nastu ta ka miniqumis.” Muqa dau tu Manaskal a Diqanina tan’a.

Makisaiv a qanitu-diklaa haan Diqanin namaqtu ikma’ai’un istaa ispindikla ihaan nastu ti tu bunun. Madia dau vinilis i Diqanin tu qaimamangsut ihaan sinbalung. Tupa dau ka qanitu-dikla tu sia naak Asqaz ta sizaun, A isaiv Diqanin ta ka Asqaza haan qanitu-dikla ta.

A palungqaqtung aipa tatini mangai tu bunun, muqa aipa hauzavhauzav ihaan asang, saivan aipa Asqaz a, ula’anin amin a tastu’asang i Asqaz, patu’a’asqazin a i’asang ta tu bunun, muqa’in dau ka bunun hauzavhauzav ukain a kainaskalan.

Haiza tatini binanau’az, uka duma bununa pasunkaviaz istaa, aupa masmuav dau aipa tu tapungulus. Tupa qanitu-dikla tu: “Nasaivak aas Asqaz, naminmanaskal isuu a is’aang.” Sinzaunin binanau’az ta ka Asqaza, kitngaain a tastu’asang bunun patu’a’asqaz amin, minpakadikla’in amin a tastu’asang tu binanau’az.

Masalpu’ Diqanina saduu bunun nastu ti tu ni’in aingka pakasihal, iskalunan istaa iskakalunan munhaan qanitu-dikla ta sisuqais i Asqaz ta. Sisuqaisunin a Asqaza a, mudaukdauk a Asqaza min’uka. Haiza dau bunun tupa tu masihal a Asqaz i, qabinun intaa ihaan inaita hubung, min’unin inaita halang ispa’u’ula ki duma bunun.

Maupa ti dau tu, nanu dau ka Asqaz un tu vinilis Diqanin tu qaimangsut, nitu maqtu ikma’aiun mita bunun. Aupa maaq a Asqaz una sizaun qanitu-dikla istusqung mita bunun. Maaq i ula’anin i asqaz a, minmangai a bununa, muqain aingka maqanuas i bunun, a minsu’nuqin; asnitu aingka saduu duma bunun minpakasihal, maszang tutuza qanitu-dikla tu sinkuzakuza.

Mavia tu masamu tu’aqaz bunun i? Naupa ki natu’aqazun ata amin i Diqanin; maaq i ma’asqaz malkabunun a, naka’asqazun aingka amin i Diqanin.

耆老說不可以忌妒人，因為忌妒是惡者的作為。有天，惡者去見天神，說天下相安無事，他沒事可做，向天神要件能在地上做的事情，天神給他掛在牆上的忌妒。他到處給人忌妒，大家開始交惡。天神見人們不再相親相愛，派臣僕收回忌妒，有人偷偷藏在身體，變成病態去傳染給別人。

忌妒原本是天神高掛起來的東西，是惡者用來玩弄人類的東西。若被忌妒傳染，不喜歡見到別人的好，就是惡者的作為。為何不可以忌妒？因為神也會忌恨你。