朗聲四起

Maaq mita Bunun tas’a qamisan a, pinpatun mapavaaz tu; Mintalaban, Talaban, Minqamisan siin Qamisan. Maszang imita bunun tu dapan maqtu tabakun.

Maaq dau ka mailantangus a kanasia unququma’an masipul tastu qamisan. Ihaan Qamisan a kilim i quma na’unqumaan, aupa makazhav a qamisan, nii a sinsusuaz natal’ia, maaq a vanis, sakut, qanvang a tunqabin amin. Paqpun pavai’an amin bunun i kakaunun ihaan Qamisan.

Mintalabanin a, kitngaa’in minang maduq, masuaz hutan, masuaz i sanglav. Mindaukdaukin a bunun haiza kakaunun. Munhaan a banananaz libus qanup, haizin a titi kaunun. Madia’in a islulus’an, maaq dau ka bunun a manaskal amin miqumis.

Talabanin a, talpapataz a bunuun kuzakuza. Kitngaa’in a sinsusuaz kapuaq kalalaas, kaupin tibanglav, malabut i ismuut ihaan quma kuzkuzaun. Lus’anin i Malaqtainga, masiqaulus i uvavaz’az, patantutungu ka bunun, mankaun i uvaz’az, mapasisiza ki bunun.

Madia a balivus ihaan Talaban, luvluvan siin balivusan. Mintun a sinsusuaz nitu sina’imaun, aupa kalinluvluvun, anqanuun i danum daingaz; haiza lumaq a muntunuq niin maqtu takda’an miqumis. Paqpun ihaan Talaban a, maaq dau ka Bununa paindadangaz kuzakuza, nakama’atikisin a kanaang.

Minqamisanin a, masanmasasakin amin a sinsusuaz, manaskal a bunun saduu, aupa tasbananin a balivus, namaqtuin sina’ima ki kakaunun. Lus’an Andaza, sizaun a kakaunun mapunhaan pat-tilasan madainpus. Kaqna pisihal i lumaq tatavi, tinlukis, matapha ki titi, biaqis makazhavin, nanii a tastulumaq bunun minkaivakaiva tu uka nakaunun.

Maupa ta mita Bunun a tastuqamisan tu inudadanan. Haizang a kaunga’an zaku taqu; maaq a pantua ihaan Mintalaban siin Minqamisan kingaa mapasnava; ihaan Talaban siin Qamisan a pal’uun.

Maaq a lus’an Kulisimasu, lus’an Tauluu siin lus’an Pavilunga ihaan amin Qamisan. Mastaan tu kazimauk tu qani’anan. Aupa maqtu aak maun vaivivaivi tu kakaunun, mudadaan qaitmal, patantutungu ihaan pantamaun siin patinaun.

先人按照農事訂一年的節期。冬季時尋找農地，春天時耕作。春天播撒小米，種植地瓜，種植蔬菜。夏天農作物開花結實，人們清理農田裡的雜草。夏季裡有許多的颱風和雨季，在夏季裡布農族人都互相幫忙，減低種種困境。秋天了，農作物成熟了可以收成。進倉節期把穀物放入倉庫裡收藏，重修屋頂，取薪，烤肉乾，天氣寒冷了不會缺乏食物。聖誕節、新年、農曆年都在冬季裡，是我最喜歡的節期。