朗聲四起

U matu’asay i ayaw anu tahesuwaltu tu“lalan” a sasuwalen, i lingatu caay kanca katahekal ku narakatan nu tamdaw a lalan.  Sisa adihaytu ku masimsimay nu mita a lalan naw mamaanay? Tadalalan hakiya? U taritataringan hakiya?  U enar hakiya?  U tepad hakiya?  U mamecelay, u saciwiciwi sanay hakiya?  U kapahay a kakayraan , u raecusay a rakatan?

Matiya namabaliyas, ira pihaceng nu bali! Katataak nu ‘urad! Malingatu tu kita a lihalaw tira tataeliban a lalan. Maperaday hakiya? Dengayay hakiya a rakatan? Anini satu ira ku nipaturu’ nu maku tu ruma alalan, u rarakatan nu saka’urip.  Ira ku pasuwalay hacuwa kaapuru nu ‘urip nu tamdaw, iratu ku semuwalay hacuwa kararaya nu saka’urip, mamaan raraya hakiya, a puru’ hakiya, malecad tu kita a mitaelib tina pa’uripan, sisa adihay ku walesay sanay a nika’urip nu lalan nu mita.

Nika midudu tu mihecaan, a masumad ku pa’uripan atu malitemuh ku masarumaay a tamdaw, a pacabay i tisuwan a remakat, herak sa kira mihecaan a‘urip i, mikawih aca tu kamay a miaray i tisuwan.  Itiya a walesay satu kisu a cacay a ma’urip, kay sinika litemuh tu ruyaruy a remakat a ma’urip maan ku pinang.

Tayni kita tina hekalan, salingatu i, malitemuh nu mita ku pabeliay i titaan tu ’urip a tamdaw, u heni satu u satataakay a cacangerayan nu mita itini i pa’uripan, midiput, pahabay, nikacaay pacabay tangasa i nikalasawad nu mita. Itina pa’uripan, a malingatu tu kisu a minanam tu sakabana’ tu adihayay, tu sapicumud i kadademakan, anu kapah ku lemed i , kay sicabay tu cacay tusa a tadakapahay a cabay a patama, a midiput tu tuas nu misu, nika ira kapahay a cabay, caay tu pacabay i tisuwan tangasa i dauc, u heni ira tu ku rarakaten atu kangalayan a saka’urip.

Matuas, matuas tu kita, araw malasining, a misu’ayaw tu caayay kalecad a saka’urip, kay anu hacuwa malitemuh nu misu ku ka’ulahan a kaying, tamaramud si luma’, sidadiputen tu wawa, araw mabaki tu, belung satu ku sunasuna miangang i titaan, itiya baki, bayi satu ku sunasuna, sulinay u rarakatan nu misu, kisutu ku tapang a maanen ku saka’urip i hekal? Sisa u tapang nu saka’urip hankini.

描述「路」的兩種含義：一種是具體的道路，另一種是比喻人生的旅途。首先討論了物理道路，提到我們在面對不同環境時，會擔心道路的狀況，尤其在自然災害來臨時。接著，文章轉向人生的道路，指出每個人都會獨自面對生命的旅程，雖然有些人會在某段時間陪伴我們，但最終每個人都要走自己的路。從出生開始，父母是我們最初的依靠，隨著成長，可能會遇到知己和伴侶，最終也會步入人生的各個階段，形成家庭，延續下一代。