朗聲四起

Yo cecay a dadaya^ no pipahanhanan a romi’ad, herek no lafi^, sacacay sa kako a romakat mipafali^, tayra i lawac no ’alo^ i taliyok no niyarao’. Oya dadaya^, mi’araw kako to taliyok, sasae:pi’ sa awaay ko rawraw, awaay ko soni^ no paliding; harate:ng sa kako, o romi’ad i, tadacai ko fa^det no kaciferang, ira ko rarawraw no tamdaw, o roray a mireko^ to nipatorodan no singsi^ a cacodaden, mato i tosaay a kitakit kako a ma’orip. Namatira, aro’ sato kako i tartar no kayakay, mipatiko^ kako a mi’araw to nirakatan ako a lalan tayni, mahapi:nang ako a maneneng ko po:long no niyaro’, matiya ma’afofoay no ta:’akay a lotok, sato’e:man saan, edengan cecay ano eca^ to:sa^ ko malikatay ho^ ko dawdaw no loma’, mate:ngil ko pi’aw’aw no waco^ i ra:ay, hani i masaterep to aca^, awaay to ko ’engi’engiw.

Aro’ sato kako i a-mo-to^, faedet ho^ na mapa’ing’ing no cidal to romi’ad. Itiya i, masaysay ko faloco’ no mako tona awaay ko mirawraway. Pasayra sa kako i ’alo^ a mineneng, miso’ayaw to lakelal, itira i semosemotan, ma’araw ako koya safelafelat sanay, caay ka halafin, ’ara:w maefer to aca^, sa falatfat sa i fafaed no ’alo^, matiya o mipadawdaway to to’eman no kakarayan. Hilam o ’aponaynay aca^. Mato mipalalay to takora’ i omaomahan ato i palapalaan.

Paka’araw kako tonini a kafahka’an a demak i, mikihatiya a maacang a lipahak. Yo ma’orip ho^ cangra i, kinafalah cangra to ’orip a mipacedi^ mipadawdaw to ma’oripay. Tonini a demak, mapalal ko faloco’ no mako, nanay minanam kita to pinangan no ’aponaynay.

Itini tona hekal, ano caacaay ko tadamaanay a tamdaw kita i, nika caay ka awa ko sanotirengan a ta-lan-to^. O ta’akay sato a ’alo^ i, ano awaay ko ’o’ol ato ’aresing no kilakilang ato semosemot i, nimaan a malata’angay a ’alo^. Orasaka, yo taloma’ sato kako minokay i, pakayni toya ma’araway ako toya dadaya^, mapa’elal a mapacedi^ ko faloco’, lipahak a militemoh to kaniharan to romi’ami’ad.

週末夜晚，獨自漫步至離家不遠的河堤，在橋墩坐下望去，此時除了幾處人家還有燈火外，已黑暗一片，看到河堤對岸的荒野裡，草叢間有一群小亮點閃啊閃的飛舞。螢火蟲是黑夜的主人，喚醒了黑夜。我喜歡麥粒大小的螢火蟲，在黑夜燃燒自己照亮大地。在它短暫的生命裡，窮其一生之力，讓自己發光發亮。

大千世界，天生我材必有用。走在回家的路上，這場螢火蟲夏夜交響曲，讓我對明天充滿了希望，也給了我能量與熱情。