朗聲四起

Tayni kita tonini a hekal, o nanitiniay i ina^ ato mama^ ko ’orip ita, o wawa^ ako saan cangra, kinafalah to ’orip a misongila’ misimokod pahafay i titaanan, Mangalay cangra a masatamdaw kita, saka papicodaden nangra kita i safangcalay a picodadan, caay piharateng cangra to hacowaay ko mala’omay a payso^. Cecay aca^ ko faloco’ nangra, nanay rihaday lipahak ko ’orip no wawa^ ako saan. Anini^, pakaynien ako i mino’ayay a ’ak’ak ko patinako^, sapipalal to faloco’ to sakafana’ ita a mangodo^ to ina^ ato mama^.

O kananaman no mita ko ’ak’ak hananay a ’ayam. nika ira ko sowal no ro:ma^ a tamdaw, sowal sa, “ Ano paka’araw to ’ak’ak i, paysin, sakalatiih no demak. ” saan, orasaka ma’osi^ ko tamadaw to ’ak’ak; nikaorira, itini i polong no kalo’ayam i, ira ko sowal no mikingkiway, o mafana’ay cifaloco’ ko ’ak’ak saan. Ira ko cecay ta’akay a kofoc, mangalay minanom koya ’ak’ak, nika caay ka edeng ko karaya’ no satokok nira, orasaka, ngitiden nira ko mamama:ngay a fakeloh, a haceca:y han nira a pacomod i laloma’ noya kofoc, ta macakat ko nanom noya kofoc, itiya ta marawis nira koya nanom.

Hatiraay ko fana’ nira, saka oya nikafana’ nira a mino’ay a pahafay to ina^ ato mama^ ko nananamen ita. Yo mamang ho^ ciira i, o ina^ ato mama^ ko pahafayay, mato’as sato ko ina^ ato mama^ nira i, caay to pakaefer, oya wawa^ a ’ak’ak i, caay piliyas ciira to ina^ ato mama^ nira. Mikilim ciira to sapakaen to ina^ ato mama^, o todong nipino’ay nira a pahafay to ina^ ato mama^, tangasa^ i kapatayan. Inian koya tatinakoan toya mino’ayay a ’ak’ak hananay.

Anini^, mamang ho^ kita, ano mite:ngil kita to sowal no ina^ ato mama^, caay pakasemer to mato’asay i, o todong no mingodoay to ina^ ato mama^ konini a pinangan. Caay ka dengan pakangoyos han ko pingodo^ to ina^ ato mama^, oya nani faloco’ay a piaray ato parihaday to ina^ ato mama^ ko so’elinay. Ano iraay ho^ ko ina^ ato mama^ ita imatini i, nanay ca’oren ita a palipahak ko ina^ ato mama^ no mita.

 

來到世上，父母把我們撫養長大，讓我們受教育，他們不求回報，只求我們平安快樂。人們認為遇見烏鴉不吉利，但烏鴉的聰明與孝心卻很出名。烏鴉為了喝到瓶子的水，會咬石子放入瓶內，使瓶內的水上升而喝到水。烏鴉反哺孝心值得學習。小烏鴉在長大後會陪伴母親身邊。母親餓了，就會嘴對嘴餵到母親口中，直到母親過世，就是「烏鴉反哺」。

小孩聽從父母的話，不做讓父母生氣的事，不讓父母擔心，這是基本的孝順，要謹記而時時力行。