朗聲四起

Adihay ko kasasiroma no takora’, ira ko tatangay ko tatirengan, ira ko mamangay ko tatirengan, ira ko i ’alo’aloay, ira ko i kilakilangay, ira ko i omaomahay, ira ko kohtingay ko koror kohcal ko tiyad, ira ko kangdaway ko tatirengan, ira ko ci folisay ko koror, ira ko pangtaay ko kalaliyaw no cengel no tatirengan, ira ko manga’ayay a makaen, ira ko ci ‘etokay caay kanga’ay a kaenen.

Kameleng ko tatirengan nangra, o kakaenen nangra sahto o fao’ no omah, sanaw o hapadang no malingaday a mipatay to fao’ no liwmah, o nga’ayay a fao’ han ko pangangan to takora’. mafana’ cangra mitakod, mafana’ midangoy ato micelem, manga’ay ma’orip i hekal ato i nanom. Katalawan nangra ato mari'angay i cangranan o ’oner ato o tolawtolaw, kita o tamdaw ko roma.

O soni nangra no mahoyhoy caay ka lecad, sa pangangan sa ko Pangcah i cangranan caay ka lecad, ’ok’ok nosa ko soni o ’ok’okay han ko pangangan, ano kora’ kora’ sako soni o takora’ han ko pangangan, o pikorohay nawhan matiya ci kodicay ko tatirengan sapangangan hanen to roma a ngangan o pikodicay, itiraay i ’alo ciyak ciyak sanay ko soni, o kaciyakay han ko ngangan, makaterikay a takora’ o katerikay han ko pangangan. I kasekakan no ’ayam ato kalalamoan nangra paytemek saan a mahoyhoy, matiya o tata’angay ’ongkakotay no omah.

Nikaorira ira ko mafana’ay mipaka’orad a takora’, ki:r ki:r saan ko soni ningra, masoni ho kora takora’ cakaeca ka ’orad, iraay ko cicilitan ningra. Iti:ya ho ira ko cecay a takora’, tadamaliyang, malomataw, kali’ki’, hali pacori to wina, taynien ko cilah han no wina, mialaala o kohcalay a calami, piradom han no wina tala cowacowa saan a misalama, piaca to fita’ol han no wina capinaon maemin mapeleng koya fita’ol, maketer matolii to ci ina.

Ira ko cecay a romi’ad, tata’ang ko adada ni ina, tahidanghan ningra koya wawa a milimo’ot, “ Wawaaw tata’ang ko adada no mako, ano mapatay kako itiraen i taporo’ ko pitadem takowanan haw. ” paca’of koya wawa “ hay ” saan. hay ko ha:y mapatay sato koya wina tadem hanira i lawac no ’alo, tata’ang ko ’orad maperar maala no cedas koya tadem ni ina, itiya ta mapalal ko faloco’ noya wawa, paongaong sato to mangic, nanoya kotem sato ko romi’ad makadit ko kakarayan ki:r ki:r sato a tomangic i papah no kilang koya kangdaway a takora.

青蛙種類多，有的生活在樹上、溪邊、田野間，有的可吃、有的有毒不可吃。青蛙專吃昆蟲，對農夫而言是幫手，可在陸上存活，也可在水裡生存，公敵是蛇、白鷺鷥和人類。青蛙叫聲不同，名字也不同。

有隻頑皮的小青蛙，愛跟媽媽唱反調。有一天，媽媽病重，叮囑在她死後埋在坡地！結果，小青蛙把媽媽埋在溪邊沙土上，大雨讓河水爆漲沖毀墳地，小青蛙很後悔，每當天將下雨，就爬到樹上哭泣。人們稱牠是會祈雨的青蛙。