朗聲四起

maki klahang gaga linhuyan ita Tayal cyunga ga, msqun qabax qutux yaya, payat ki magan ini ga pitu spat muyax, qutux nniqan khmay hayiy ga tehuk mpusal muyax, “ cmyus ” qa puqing gaga qalang, qqumah ru snhyan na utux bnheci qa puqing uyi siki mwah mlahuy qabax ccquliq pklahang gaga, ini uwah mlahuy lga, musa mtkiyay qabax pinbahu ’nyan kawas qani la.

qutux qutux glux ga, nyan mlahang qutux qutux gaga na qqalup, uka sinnwalan ga, ini cbalay hmut miyup qyunam na cquliq, smi mrusa qyunam ga, siki mkkayan ru mqbaq, maha kya ga thuyay hmtuy sinqilan ro pincriqan. mtnaq nasa uyi, mlata cqa qyunam ga, lmon mqbaq ini ga cyan nha rema syan rusa qyunam qaca la... qutux qutux klahang gaga na qyunam qalanag ga, nyan nanak mrhuw cmpung qqes, hminas qqes hbiyax qsinux huyil ga, spatun nha qabax qsinux, mquriq magal cnriq na cquliq qsinux lga phugun la.

musa miyup qutux na qyunam ga, siki mqbaq ini ga cyan nha rema syan mrusa rgyax qaca, mhmut miyup lga, isu ki huyil magal qilis la, giwan nyan mwah cmlaq qyunam na cinqyunam, qaniy ga, qutux nanak na psaniq, maki hupa sinna’ang na utux bnheci. qabax gaga qani ga snibil ki pinsbaqan binheci ta cyunga, qani uyi ga, giwan iyat tqlihul gaga qnxan klahang na qyunam, thuyay mwah mhut inlungan qabax llaqi na tayal puqing pqalup. maki nanak sinrhu gaga psaniq tayal, ciriq qsinux maki qyunam na cquliq ga, siki sbiq su qcahuy he na qnasux nqa cinqyunam, ini su biqi ga, phugun su nya utux ta bnheci.

gaga klahang rgyax qani ga mtnaq inlungan ru kntayux ta tayal cyunga, srhu mlahang linhuyan na qutux yaya, gaga na cmyus ga, giwan qutux na qpiying ro ryaniq phkngyun. llaqi tayal maki qcahuy gaga qani mlux mrkyas mqyanux ro ’mubuy tmninun, qabax qqnxan, inlungan, ptyawun, he prkyasun, nyan blequn mlahang cqa utux ta bnheci ta.

泰雅族社會與組織裡，儀式以部落為中心，年度重要的農耕與袓靈信仰禮儀，所有祭團成員都要參加。每個祭團自有獵場，不得隨便進入他群獵場。若要放陷阱，必須通知其他族人。帶獵犬進入獵場以前，也要先確定有無陷阱，否則擾亂前人權益，會觸犯禁忌。獵狗追獵物追到其他部落領域，獵物就成為共有。獵人私佔獵物則會遭到懲治。泰雅族禁忌和習俗，若別人的獵場捕獲之獵物，務必將重要部份帶給獵場主人，避免受到袓靈懲戒。