朗聲四起

lubux qani ga maki qabax cqa n’inu na cinqlangan, ana Tayriku, Itunisiya, Intu, Malasiya, Beliping, Nyusilan, ro Awtaliya ga maki lubux qabax. maki qqaya na lubux qa ccquliq qani ga sisay maha nanak Tayal ro S’ciq ga memaw  mmulux calay ywaw na gaga lubux qani. sayin rok qani ga iyat nanak maki lubux be’ux ru sayin hmali, memaw ski magal, spat na hmali, sisay maha pyanga btiyux na cnbwanan ani.

Gaga qwas na Taywan Genzyuminrok qani ga mmulux ro mllamuw ywaw nya uyi, nyan m’culah qutux llyung, ini c’alax gaga na Tayal qani, pyanga nanak qa hintgan ywawa nya ga knahul gaga na lubux qani ga musa ta baqun lalubux na Tayal qani ga smungus pinnqas nana qa ywaw nya, baqun mkkayal qsliq mlikuy ro knerin uyi, ana llaqi tyaba kawas baqun tlubux. nanak minbahing qa muyax qani ro trang mlata qmalup qani ga ini hmciy tlubux. piyux cnyan hmali qa lubux Tayal qani, sisay maha mnanak ywaw na qabax cinbwanan qani, pinnongan ga kenah kinpiyux hmaliy nya ga ski payat hmali nya. kntayux ta bbiru qani ga tiyu hmali qa pnatas naha miru. ccquliq Tayal mwani ga stalam naha tmwang hmaliy, maki lubux totaw, lubux be’ux, lubux sayin hmaliy eta spat hmali, squnun ga qesux qabax qqaya lubux qani, hkuy na hngiyan qa lubux Tayal qani ga spglux payat hkuy na qwas na lmuhux Tayal qani.

nanak lubux qani maki nanak ywaw nya, tlubux qani laga, twangan ppiyuy uyi, ptlubux ru mkkayal qa mlikuy ro knerin, ngyut tlubux ro ngyut kmkah kakay, ini ga hmkuw tazi ro stopax ppiyuy. lubux qani ga pisan nyan mkkayal qqsliq uyi, calay ga skayal ke, ana ga knahul tlubux qani sgiwan nyan kmayal ywaw na qqsliq qani, maki qutux ke maha, nya cimang ke htgan lungan nya. ryax coni laga ngyut uka cquliq huyay maha kya htgan qsliq la.

cyunga nanak ppnbaq ywaw na minrok baq sku qqaya na lubux cqani, khmay mnanak tqbaq qwas na Tayal qani ga minnagal hngiyang na qwas qani ro cnyan naha Kanpyuta qani, sisay maha ini mbhkux calay qa knihuy naha hkani tmwang pinnbaq ywaw nya qani. garing qutux seng qsux kbhul qesux pgal sayin kawas kyaga, sisay maha sinbalay cqa ini hngaw rmurux linhuyan na mnanak tqbaq skbalay lubux na Tayal qani la.

 

口簧琴分佈各地。泰雅族發展出多簧琴。泰雅族口簧琴用於自娛、男女訴情，老幼皆宜，但特定禁忌場合除外。該族以多簧口簧琴聞名，傳說可至八簧，簧片音高構成獨特的泰雅音階（大二度、小三度、大二度）。口簧琴不僅是樂器，更可用於口簧舞（男女對跳），或代替語言傳遞訊息，作為青年男女說悄悄話的工具，在文化中扮演重要的交際與娛樂角色。

口簧琴文化，尚有許多族人口簧琴技藝精湛，1992年起系統傳承與培育人才。