朗聲四起

Sowal sa ko fofo ako i takowanan, “Yo kaemang ho kako, ano mitilid i, tanosaripa:’ sa talakongkoan. Makafakeloh ko lalan itiya ho. Ano o laloodan to faedet ko romi’ad i, romakat sa i lalan to katayraan i kongkoan, misatokiyakiyal a misahikihiki to oo’, misateroteroc a comikay, matalaw to karakaman no saripa’. Ya satapang i, cowa kaeca marakam, macocok, sanalsalen a caenget ko saripa’. Ikor to i, mafana’ to a pakalawac no lalan a romakat, mililis to to semosemotan a romakat, nga’ ca karamok no faedet ko saripa’.” “Wata! Kasapaan, kahemekan ko ’orip iso fofo i kaemang ho saw!” han ako ci fofo ako.

Doedo sa to ko pitawciker no fofo ako, “I fatad no lalan to katayraan i kongkoan. Ira koya sopi, sakidefet sa i lilis no lalan a malengaw. Mipapahanhanay kako itira a misalama toya papah no sopi. Ma:olahay kako a mitatefin to papah nira. Hay tefing han mafekotay kira!” “Fofoaw, mahecad kita maolah a misalama to sopi!” han ako si fofo ako. “Ano sapiliyasan toya matarangay no cidal a lalan, ripa’en ako ko lengaw noya sopi.” “As! Cowa tahaceka ko saripa’ iso haw?” han ako si fofo ako. “Mananamay cowa kasikoco kona oo’ a romakat, mansa kahefaen toya sopi a romakat. Cowa kafana’ to adada. Hayken, o kakifetol to no ’ofil alatek kona saripa’.” san ko fofo ako.

Toya kalaholoholol niyam to dadaya. Cowa ko mamatawal ako ko ’orip no kaemang ho, sa ci fofo. Kako han to i, cowa ko mamatinako ako ko matiniay a ’orip, cowa ko mamafana’ kako to samaanay ko tanosaripa’ sanay a romakat to cifakelohay a si’elac. Miripa’ haca to citafaay a fakeloh. Kaorira, mafana’ay to kako tona ratoh no tawciker ni fofo. Kalimlaen ko losid iso, ’orip iso sanay. Aka ka apacang han ko kalolosid; aka pisaloya to romi’ad iso, sanay ko tatodong nona tawciker.

本文描寫童年時赤腳上學、奔跑與遠足的回憶。回憶走在石頭路上的刺癢感、夏天草皮上踮腳行走的情景，以及腳底因常與土地接觸而長出厚繭，練就「鐵腳」。赤腳踩踏含羞草、尋找野果，與自然親密接觸，是童年的日常。當學校宣布遠足，內心滿是期待與喜悅，特別盼望媽媽準備的便當，像蘿蔔炒蛋、黑豆鼓炒小魚乾。由於不習慣穿鞋，遠足當天仍將鞋掛在脖子上打赤腳出發，展現出純樸快樂的童年生活與對土地的深厚情感。