朗聲四起

Ano tapalen kona tahaf no kakarayan, o sakaira no pina’orip ko tokos ato riyar. Ya kalomahad no kilakilang i tokos, mata’elif to ko pinapi:na a molefot no mihecaan. O pina’orip no riyal, masamolefot ko mihecaan nangra. O paka’araway a tamdaw i, masapa ko faloco’ nangra to kalomahad nona pina’orip.

O tokos hananay, mahecad o wina a mipa’orip to maamaanan a kalo’orip. Painien ningra cangra to nga’ayay kaitiraan a malengaw. O nga’ayay haca ko mipatalaan ningra i cangraan to sakilengaw a lomahad. Roma sa to, o sanga’ayay a sakalalicay ko tokos. Mafana’ cingra pakanga’anga’ay to kalocafacafay no pina’orip ato pinalengaw. Cowa pisateked, cowa kala’afa’afas to sera cangra i tokotokosan. Nanay mahecad ko olah ita to tokos. Ano cowaco:wa ka kadofah ko kinaira ita i, ka padamaen to ita ko marorayay a tamdaw. Hinomen to ita ko mararomay a tamdaw. Pakafana’en cangra to cowa ka sacecay sa masapakoyoc ko tireng nangra itini tona tahaf no kakarayan.

O tokos ato riyar, mahecad to wina ato wama ita. Pakafana’en nangra kita to masamaamaanay a demak, kafahekaan, kakapah nona hekal. Ano saromaen ita ko pihapinang to tokos ato riyal i, o roma ko pisimsim ita to demak. Ma’araw haca ita ko tadamaan nangra. Ano marawraw ko faloco’ ita i, katayra i riyal anca talatokos nga, mahepol ko roray a masaysay ko faloco’.

以山與海為比喻，表達大自然如父母般教導與啟發人類。山象徵母親，無私地滋養生命、促進和諧，鼓勵我們學習山的包容與愛心，去關懷他人。海則像父親，海浪的變化提醒我們體會他人情緒的重要，學會耐心傾聽與適時溝通。山與海不僅代表自然的壯麗，也教會我們人生的道理。只要以不同角度看待自然，就能發現生活中的美好與智慧，並讓心情更加平靜與愉快。