朗聲四起

O miharateng no waco i, o siloma’ay nira a cecay, saka o hemek ato lipahak ko matomesay i faloco’ nira. O tamdaw i, adihay ko milongocan, misaalian nira, o nanay to sitosiya, pakahikoki talacowacowa misalama, o loma’ to hadafong no tireng, o nanay to kapayso no tireng.

Ma’araw ho no waco ko siloma’ay nira i, hemek sa a misateroteroc a miraod to siloma’ay nira. Afofo han no siloma’ay i, nacnacen to nira ko pising no siloma’ay. Ona pinangan no waco i, o hemek ato lipahak no faloco’ nira korira.

Ano ira ko mikari’angay to siloma’ay nira i, mipa’ading a miaw^aw ko waco. Deng kini! O aira ko sapipatayaw to siloma’ay ako saan i, kinafalah sa to ’orip a mipa’orip to siloma’ay nira.

Hakowaay ko kareteng no olah hananay, nga’ayay a tingtingen saw? Ona olah i, samaanay ko ka’angangol nira saw? Maapa kita a mipacako. Ona olah i, hakowaay ko raay nira? Wa kahirahira saan ko miharatengan ita. Nikaorira, cowa kaeca a cipinang kita ano so’elinen a tapalen ko faloco’ ita.

O olah hananay i, awaay ko pitolasan nira i ’orip ita. O olah hananay i, cowa ka’osawen ita ano midimokos, mipadang to kasida’itan ita a tamdaw tahada’oc. Mato o kakahemaw no opih alatek ko piharateng no nima to kakareteng no olah. Nika, ona milongocay to olah ita a tamdaw i, cowa ko mamakotay no tao ko olah ita i faloco’ nangra. Ona olah ko palasinolay to kaketer no faloco’ no tamdaw. Ona olah ko pakalihadayay to faloco’ no tamdamdaw.

Saka, hakowaay ko kareteng no olah hananay, nga’ayay a tingtingen saw? O waco i, deng kini! O aira ko miri’angay to siloma’ay ako sa i, awa ko talaw nira a mikoromot toya miri’angay a tamdaw ato o maamaan to nikatahalifa to tatiihay. Awa ko harateng nira to nika o sakapatay nira alatek kona pidipot to siloma’ay nira. O nini ko sakahemekan ita to olah no waco to siloma’ay nira, salaw o aniniay a tamdaw i, hawawa han nira ko waco. Ikaka ko waco to widang ato loma’ay i faloco’ nira.

狗對主人的忠誠與深情，對比人類的慾望與需求，傳達「愛」的真諦。狗不求回報，只要主人陪伴就感到快樂，甚至願為主人犧牲生命，展現無私與忠心。文章進一步探討「愛」無法用金錢或距離衡量，因為愛是一種真誠、無保留的付出。真正的愛能撫平怒氣、帶來心安，是人生中最寶貴的情感。狗對主人的愛純粹而深沉，也因此有人視狗如子女般疼愛。藉由狗的行為，引發我們對愛與情感價值的深思與體會。