朗聲四起

O laloodan awaay ko kucu malingad tayra i kongkoan tanosaripa’ sanay a romakat, ano romakat i lalan sateroteroc sa a comikay, makafakeloh haca ko lalan. Ya satapang ho tayra i kongkoan, marakam ko saripa’ macocok adada a caenget ko saripa’, mananam to i, lahedaw sanay to ko rakam no saripa’.

Ano o laloodan ho faedet to ko romi’ad, misacidalan ko karomakat i lalan, maramoken ko saripa’ pakalawac no lalan mililis to semosemotan a romakat, oya karomakat i, satokiyakiyal han a misahikihiki ko oo’ misateloteloc a comikay, nga’ caka ramok ko saripa’. Rakarakat sa ma’araw ko rengaw no sopit sakidefet sa i lilis no lalan a marengaw, salamaen ho ako koya cicekaay micekaay to saripa’ a sopit, ano tefing han fekot sanay ko papah nira.

Ano maramok marakam ko saripa’ o rengaw no sopit tadamarariday ripa’en a romakat, o rengaw no sopit sa’foyot sanay kahefaay haca ripa’en kahefa caka maramok ko saripa’. Nawhani, o nano kifetolay to ko ’ofil no saripa’ mansa cato kataraw to ceka ato rakam ko saripa’.

Pakayni tona demak, o tatinakoen no niyah nga’ mafana’ to samaanay

tano saripa’ han ko karomakat to ci fakelohay a si’elac, miripa’ haca to citafaay a fakeloh ato mifokfok to ma’icangay a papah no kilang.

O saripa’ sa misacikacikay i omaomahan i, o katinakoan i rakat no ’orip cowa ko mamatawal kona pinangan, nano kaemangan ho a ’orip tanosaripa’ sa comikay i cangxa i omahaomahan, mita’elifi to maromotay a lalan, mikakilim to heci no losay, itiya caho paka’araw to tamaka a lalan, o cifakelohay a lalan ko marariday a rakaten, halafin to miripa’, cato katalaw to kietec ato rakam mahecad to o malad to ko saripa’.

Roma sato, ira ko sowal to mamiinsok sanay a ratoh, waw! lekal sa a mahemek, misaharaterateng to o maan ko paparoen ni ina a dateng i patafoan! O manan a datengan ko nisadayan ni ina sa! “ Hai, itiya ho ano o saytaw to mi’icanagn ciyanen to fita’ol, o tawsiw ciyanen to hipaw tada o sakakaay a kadofahay a patafoan a miinsuk ” ya mamiinsok sa ko sowal i, toya dadaya safelifelin sato i kafoti’an, cato ka ala ko fafoti’en to hemek aca. Miinsuk cikucu to, sa ko ratoh, ’araw han, nacowa kananam a cikucu, so’oten ko saso’ot no kucu a mica’elayen i ’afala, caka nanam a cikucu, o saripa’ ko karomakat hacikayay ko rakat a miinsuk.

描寫童年時赤腳上學、奔跑與遠足的回憶。走在石頭路上的刺癢感、夏天草皮上踮腳行走的情景，以及腳底因常與土地接觸而長出厚繭，練就「鐵腳」。赤腳踩踏含羞草、尋找野果，與自然親密接觸，是童年的日常。當學校宣布遠足，內心滿是期待與喜悅，特別盼望媽媽準備的便當，像蘿蔔炒蛋、黑豆鼓炒小魚乾。由於不習慣穿鞋，遠足當天仍將鞋掛在脖子上打赤腳出發，展現出純樸快樂的童年生活與對土地的深厚情感。