朗聲四起

Ira ko cecay a romi’ad, maharateng no mako ko pasifana’ no singsi takowanan i kongkoan, sowalsa “ Aka pitawal to sowal no mita o ’amis. Nawhan, mahecad to pidotoc no wina to sowal no ’amis ko pipalatamdaw ira kitaanan. ano mapalasawad no mita ko sowal no ’Amis i, o mapalasawa day to ko serangawan no mita ” saan. “ Ano ira ko likoda no niyaro’ aka ka toka mikihatiya to likoda, nga’ mafana’ kiso to kasarayray no masakapotay ”. O romasato a sowal no singsi, “ minanam kamo i kongkoan to sowal no ’Amis, aka ka o sapialaaw aca to seking ko pinanam. Yanan o sapipalowadaw to sowal no mita o ’Amis ko safaloco’en a minanam ” saan.

Malawed sato ko pa’aliwacan no kongkoan, minokay kako tayra i niyaro’ mikihatiya to likoda no niyaro’, toya a papacem mikalic kako to kasoling a minokay, mahemek ko faloco’ a hinatala to katahira i loma’. mita’elif to omaomahan ko cikay no kasoling, tapal han a minengneng pasisasingaran no kasoling ko omah, sakangdaw sa a masasikasikak ko ecan to kahirahira no pinaloma. Hacikay ko kasoling, hato maeferay kako to pisa fedefedet no omah a pasaaikor mitafesiw, cowa ka takop no mata a mihapinang minengneng ko pinaloma a losay. Mahecad toya citiliday a dawdaw cowa ka tomerep a misatikotikol a malileng.

Tahira kako i loma’ o dadaya to, miocol ci fofo takowanan tayra i sefi mikapot to sa’opo no kasakapot, tahirahan no mako awa ho ko kapot, caho caho irato ko tarokos no kapah, sa’opoen ningra kami a pakafana’ to kafafaw no kasakapot. Palimo’ot to sapirikec tamiyanan, sowal sa! “ kapitengil kamo to sowal no kafafaw namo, aka piliyang to piocor, kamo o kararem kapingodo to kafafaw, aka pico’a’ang to sowal no kafafaw namo Tona tolo romi’ad a likoda. Aka ka lasang kamo, ano ira ko malasangay ato matomayay malitefoc no kafafaw, ano manengneng namo ko malasangay a malitengay kitingen a panokay ” saan ko palimo’ot ira a pakafana’ I tamiyanan. Tona tolo romi’ad, ano cowa pikihatiya kako to likoda ato kasarayray no kapot i, cowa ko mamafana’ kako to demak ato rikec no masakapotay a likakawa. So’elinay, tona tolo romi’ad a likoda, adihay ko kafana’an no mako to demak no niyaro’. roma sato a sowal no tarokos no kapah, “ itini I ka’ayaw no malitengay aka pisano kowaping kamo, sano’Amisen ko malitengay a misacaciyaw! ” saan.

描述了對族語學習和部落豐年祭的經歷與反思。文章開始提到老師曾教導過要保護族語，並強調學習族語的目的不應僅是為了取得認證，而是為了讓族語得以延續，避免文化流失。描述了回家參加豐年祭的過程，從火車上看到的景象到回家後的活動安排。部落的青年領導者教導大家必須尊重長輩，遵守規定，不可喝醉，並且要積極使用阿美族語。豐年祭的參與，對部落組織和文化的深入理解。這篇文章強調了族語的重要性以及傳承部落文化的責任。