朗聲四起

O kakarayan hananay, awaay ko mafana’ay to hakowaay ko kakahad no kakarayan, ano macahelak ko romi’ad a nama’orad i, makapah ko romi’ad, nengnengen han ko kakarayan salangdaw sa a fanahal, awaay ma’araw ko tolas no salawacan to kakahad no kakarayan. O kasatati’e di’edip no o’ol, mahecad o riko’ mica’itan i kakarayan. Adihay ko kasasiromaroma no cengel, ira ko kohecalay, o kohetingay, romai, sanonamalay ko kahengang, o kaliyalaway, mahecad to cioo’ay, misarakarakat i kakarayan, mahecad to fadahong no loma’ konini a o’ol, mi’ading to tarang no cidal.

Ma’isil a malinah ko folad i kakarayan, pasifana’ kitaanan to haco waay to ko mirakatan no ’orip ita. Ira ko kasasiromaroma no folad a pahapinang kitaanan, ira ko ’arawraway, ira ko masatawaay, ira ko sano kalaway. Nolatek ma’ading no cidal ato o’ol, awa to ma’araw no mita. Ano mahadak ko folad, ira ko ta’e:ngaday ko likat, roma i, cowa ka ta’engad aca ko likat. Saka onini a folad, cowa ka pasela’ a pa’edil kitaanan to dadayadaya to romi’ami’ad, o pasifana’ay kitanan to pinaay to ko toki ano hatini osanay nira.

O roma i, ira: ho ko misa felafelatay a fo’is malikat i kakarayan, anini awaay ho ko pakasa’osiay a tamdaw to hacowaay ka adihay no fo’is.

Ano monihar saho ko romi’ad, awaay to ma’araw cangra, ano talacowa:ay to, mahakakerem to ko romi’ad, ira to mahadak ko ’edil nangra a misafelafelat i kakarayan. Ira ko sata’engad sanay ko likat, romai, to’emanay ko likat, ira ho ko saka padepadengan sanay ko likat, onini a likat maemin i, o fo’is han ko pangangan cangranan.

I ’ayaw no mamafodo’, ira ko fitili’ ato kakerengay! ’ayaw no kakereng, sedayseday sa ko dapiyatay i kakarayan, terep han no kalapiyat i, sakalongkong sato ko honi no kakereng. O kalapiyat ato kakereng, mitena’ay to ta’angayay a ’orad. Ano naikoran no ’orad, macidal to ko romi’ad, iramahadak ko lidek, adihay ko kasasiromaroma no cengel ni lidek, tada makapah a nengnengen, sano, kayakay ko kali’akong no cengel ni lide, mahecad nga’ay kayakayen no mita tayra i kakarayan.

描寫天空的各種景象。晴天時，天空廣闊無邊，呈現碧綠色，雲層像衣服掛在空中，形狀與顏色各異，像在天空行走，也像屋頂為人們遮陽。月亮在天空移動，提醒著生命的流逝，月相有上弦月和下弦月，光亮程度也不同。星星數量無法計算，白天隱藏，傍晚才出現，有明亮也有微弱的。傾盆大雨來臨前，先有閃電和雷聲，閃電和雷聲似乎阻擋著雨勢。雨後陽光出現，隨之而來的是色彩繽紛、彎曲如橋的彩虹，仿佛能通往天空。