朗聲四起

Patas Dowriq Knkla kuyuh Truku nii, saw nii pgkla knkla tminun ka kuyuh Truku qmpah ni knkla lmnglung. Kska kndsan Truku o qmpah ngangut ka snaw ni qmpah rowan sapah ka kuyuh, kana saw ka meuxul hilaw misan ka qabang, plkusun kdjiyax o ida mnda baga dha tminun kana, manu saw kiya do kuyuh ga asi ka mkla bi tminun ni ptasan dqras, tai saw miyah smkuxul dhyaan ka risaw, ptasan dqras o kika mtduwa muda hakaw utux musa tuxan rudan hiya, klwaan tuxan hiya, mniq kska alang o spruun bi qmita seejiq alang uri, muda saw nii ka kuyuh o hiya nanak asi ka muda smluhay lmutut tmgsa qqpahun mseusa ka kuyuh. Tqnay bubu na mmkay ruwan sapah, mhapuy, smksik, mahu lukus ni kmaraw llingay, mmiyak tmabug rudux ni babuy, musa mapa wahir, bunga ni mdngu rpiq qhuni thuun mhapuy qnlaw . Quri mseusa o smkrig, mnuqih, tmgiya, dmaus, dmgsay, tminun qabang hhilaw, lukus ni miri. .Sgnaah mtkla bitaq tghdu ddulun bubu ka laqi o yaa bi 10 hngkawas. Laqi o tghdu ka kndkilan, knkla ni biyax kkeudus do o, biqan kari rudan ttpusu dha ni mkla nanak euda meudus.

biqan qngqaya ubung ni qaya tuunun dha miri, tduwa ptasan dqras, tduwa mstrung. Rmngaw laqi kuyuh ka tama, biqun misu qngqaya cinun ni miri, djiyun su meudus bitaq hngqilan. kkla su tminun ni miri, euda hakaw utux. Seuxal o kana llingay sapah dha ka Truku o ka ida asi ka mhuma krig, yaasa kykuyuh Truku paah krig nii ka ngalan dha nuqih tunun dha qabang ni lukus. Tnunan dha lukus o mgkala balay kana Seejiq Tnpusu. Phmaan dha nealu qdrux ni lnglingay sapah, kiya o prilan dha sudu ni qbulit, kika malu bi kndkilan na ka krig, kiya do kykuyuh o madas gsak ni saan dha smkrig ka krig, kika maanuqih, qnqihan do maabkuwir, bnkuwir do ptgyaan, tnegiya do pdowsan, pndowsan do puyun qbulit ni maabhgay bi waray cinun. Babaw na nii gbuan tnabuy masu, kkhnuk na tunan. Hiya na do psudun, pnusut do pdgsayun, dnegsay do psaun ubung ni tunun da, tninun do maatnegxal, dha tnegxal o maakingal qabang da.

Kuyuh Truku o asi ka paah laqi bilaq smluhay tminun, kiya o asi ka mkla balay tminun, nasi ini saw kiya do sblaqun qmita seejiq alang hi da, ini tduwa muda hakaw utux ka babaw mhuqil musa qrasan tuxan uri. Muda hakaw utux ka seejiq o asi ka mkla tminun miri ratuk ni pala rnsabung.

賢慧之眼凸顯出太魯閣族婦女在織布上的成就、貢獻及智慧。傳統社會，有紋面的人，才能通過彩虹橋進入祖靈的聖地，社會地位上亦受到尊重。傳統社會的女性會學習織布與傳承技藝，跟著母親學習做家務事。

父親對女孩說：「我要賜給你織布及織布紋的工具，使你會織布及織布紋，能走過彩虹橋。」要通過彩虹橋者，要會織挑織布紋及披肩這兩種編織。