朗聲四起

Payi! Gaga su inu hug? Gisu ku qmita patas qabang, gnealu dowriq su o lnglungun mu balay.

Payi! Gaga su inu hug? Nii ku mlukus tninun baga su, kneuxul baga su o lnglungun mu balay wah!

Payi! Gaga su inu hug? Qmita ku nngalan sasaw utux pnspuan ta, lnglungun mu balay ka gnealu su knan.

Payi! Gaga su inu hug? Paah ku bilaq ini su pstuq qmlahang kmlawa bitaq nhdaan, spian misu ga su tluung hakaw utux, tlhulis su tmaus knan. Balay bi lmnglung ku sunan wah!

Payi! Gaga su bi inu hug? Ida nii mniq ska lnglungan mu, ana knuwan ida mu lnglungun bi ka suyang bi kndsan su. Saw nii o mtqiri ska luqi tunux ni ska lnglungan mu, lmnglung ku ana bitaq knuwan.

Mqaras ku balay, Kla su ha kika “ Payi mu ”.

Kuxul mu bi balay wah!

Lnglungun mu balay kntmaan payi mu quri utux tmninun, ana manu o tndhuun mu ka isu, yaasa kana klgan uqun ni pnegalang o snalu baga su kana, babaw tnukuy nami do thdagan , shdaan su, pqyuxan su, sdmlan su, sbhuran su ni pkdakil bitaq emphpah ni mghiyi kana. Duri o nii su dmuuy kana kneudus samat, qbhni, kuwi bbuyu ni qsurux gsilung ni yayung, bitaq kana yyami nii o gaga suyang baga su kana.

Musa qmpah qmpahan, mksa bbuyu, ni matas ptasan ana inu ka laqi nami o empniqun ka djiyun dha aji mowda mksula elug. Iya pngali luqih elug, saw mha rinah emblaiq ni mqaras sunan, tmdahu hangan su, smtama sunan ni thmuku sunan, isu ka utux tmninun ana manu. Hngkawas sayang ka kndsan nami o malu balay knlwaan su, gmhak nami o malu balay nangal nami ni mttuku balay, kksa nami bbuyu o kmalu utux, biqi kkla matas ni klwai ka lqlaqi nami, hkawas duri o sbliqi nami duri, saw nii o mniq kska lnglungan payi mu kdjiyax.

我看著織布上的圖騰，想念奶奶。奶奶!您到底在哪？其實您一直留在我的內心深處，迴盪在我的腦海與記憶中。我時常思念，祖母對編織神的稱讚。因為編織神的照顧，今年是豐收的一年，我們的生活是順利且飽足。