朗聲四起
ku igayganeana, ku daane ki Paiwanzuku, Bunungzuku si kuta ka Ngudradrakai mahamahamau ka nyahalrenega tudaane ka talaalibi.
lu tudaane ku talaalibi, ku sahakaiyanelringa amani kay lrenege si angatu. kay lrenege ahakai drwalri, tubalingibingi, tutaidrale, tulrugulruga, hwaedre si ahakai walibi.
kay bulri, ulrudru, tadri, vagingi si bali nyahakaiya ku angatu. ku tangidahepa ki talalibi ka daane mahamahamau, sakatha ku swatiki si swadrau ku tamakakaelaa. tahayakai ku drusa ku lribange, la ikay ku saulatadra, athau, ku tangimiya ki taliadringa ki daane, la ikay ku tapeapeca ki lavavalake ka telebe si tapeapeca ki lamatauwa si yacengecenge ka thuhuhu, yakai ku taulrwana ku ngwakakai ki taidrale, yakai ku tasahasaha pudringai ku ladilrungu ka calakeba, takelradha ki lalrabu ka tumukudru, tasekeseketa ki taleke ka drausulu, la ikai ku lrisua, ki lrisua yakai ku tagaga ka talabua, belenge ki talabua yakai ku capa ka takutukutuwa ki becenge si lapanai, miyalri ka tapakameameala ki madihethenge ka lasatwatuma si sakanekanea ka latakaiya.
ku kalatadra nidralriya pasaelre, amani ku tapavaivaiya ki lataleke. yakai ku taililinga, ku swadrau ku kalatadra, yakai ku talyabange ka taikaikaiya kalaelaelange. ku sataleka ku tacekecekela wadahepe ku kubau.
kay talaalibi ka daane amani ku panyaniyake ka daane niya, asiluiya lu ikaiya ki talaalibi cekecekele, ku ebelre ki apui, twalai ki takatangaha ki haedre, twalai ki alibi tubebelre miyaki panyanyaniyake, kay bulri lu kaemeaunga ki takuebelra hau makecenge si kai kikanekane ki alalubai. lu kaladrangedranga, ku saseveha kainganai ngukakai ki haedre papudane lakangangehece, lu kalakecelra yakaimadu daane twapui lakaculu. amani kwadra nielrelrea ku lrigila ki cucungulaneta ka mapapedrenge makecenge ka daane.
ku nadruma, ku wacekecekele makanaelre ikay ki talaalibi si cekecekele, amani ku tamahaihaisa ki niyake ki wacekecekele palralrawthu.
魯凱族的傳統建築是石板屋，石板屋的主要建材為石板、木柴周圍牆壁以石塊堆砌。房子結構設有兩扇窗、兩道門，屋頂有天窗，屋內為臥房，靠窗兩側亦有臥房，前牆內側設有坐檯及爐灶，灶上有木架或竹架以用來烘乾食物或餐具。置物台是放置陶壺及甕的地方，另一間小房間設有穀倉。
庭院鋪設石板，家境富裕的會有廣場，做為乘涼場所，有的家庭設有高腳穀倉，放置農作物。石板屋內冬暖夏涼，是魯凱族永遠安身立命最典型的傳統建築。